12.03.2020 15:24

M. b. Njáll GK 456.

Mótorbáturinn Njáll GK 456 var smíðaður í Reykjavík af Otta Guðmundssyni skipasmið árið 1916, sennilega fyrir Loft Loftsson útgerðarmann í Sandgerði. Eik og fura. 12 brl. 25 ha. Skandia vél. Báturinn var seldur árið 1919, Guðlaugi Br Jónssyni, Jóni Hafliðasyni, Sæmundi Bjarnasyni og fl. í Vestmannaeyjum. Báturinn fórst 16 febrúar árið 1923 þegar hann varð vélavana og rak upp í Hringskersgarðinn (syðri hafnargarðinn) í Vestmannaeyjum. 4 skipverjar fórust strax, en 1 var bjargað á land meðvitundarlausum, en lífgunartilraunir báru ekki árangur. Njáll hafði ekki verið umskráður til Vestmannaeyja þegar hann fórst.


Njáll GK 456 í bóli sínu. Ljósmyndin er tekin á Norðfirði.                                      (C) Carl Ólafsson.


Mótorbáturinn Njáll GK 456. Þessi teikning kom í Sjómannadagsblaði Vestmannaeyja árið 1972.

                     Bátstapi

Í Vestmannaeyjum vildi það slys til í fyrradag, að vjelbátur sökk örstutt utan við hafnargarðinn og týndust þar allir skipverjar 4 að tölu. Slysið bar að með þeim hætti, að vjel bátsins stöðvaðist rjett utan við hafnargarðinn. En norðlægur vindur var og hrakti bátinn á sker, sem þarna er skammt frá garðinum og brotnaði óðara. Höfðu tveir vjelbátar aðrir, er til hans sáu, leitast við að koma í hann dráttarkaðli, en ekki tekist. Báturinn hjet Njáll og var úr Skaftafellssýslu. Allir voru mennirnir ættaðir utan Vestmannaeyja. Það fylgir þessari fregn, að slys þetta sje nær því dæmalaust, að vjelbátur sökkvi með þessum hætti svo nálægt höfn. Er það fullyrt, að bátsmenn hefðu ekki þurft annað en að kasta akkeri þegar vjelin bilaði, þá hefði öllu verið borgið.

Morgunblaðið. 18 febrúar 1923.

Þeir sem fórust með Njáli GK 456 voru;
Sigurfinnur Lárusson formaður, Álftagróf í Mýrdal, 27 ára. Hafði hann farið ungur til sjóróðra í Vestmannaeyjum, en þetta var fyrsta vertíð hans sem formaður.
Erlendur Árnason vélamaður, Borgum í Norðfirði, um þrítugt.
Sigurður Hallvarðsson háseti, Reynisholti á Mýrum, 33 ára.
Guðfinnur Jakobsson háseti, Skammadal í Mýrdal, 24 ára.
Magnús Runólfsson háseti, Skaganesi í Mýrdal, 36 ára. Honum var bjargað á land, einum skipverja, en lífgunartilraunir báru ekki árangur.

Þrautgóðir á raunastund Vlll bindi.


Flettingar í dag: 265
Gestir í dag: 86
Flettingar í gær: 1558
Gestir í gær: 541
Samtals flettingar: 1960262
Samtals gestir: 496294
Tölur uppfærðar: 9.8.2020 05:03:08