Færslur: 2018 Ágúst
05.08.2018 13:04
Stuðlaberg NS 102. TFSY.
Nýtt
stálskip til Seyðisfjarðar
Seyðisfirði, 28. júní. Nýtt skip kom hingað í gærkvöldi. Það
er Stuðlaberg NS 102. Skipið eiga þeir Björgvin Jónsson, fyrrv. alþingismaður,
og bræðurnir Jón og Kristján Jörundssynir. Jón verður skipstjóri en Kristján
vélstjóri. Stuðlaberg er stálskip, 151 smálest að stærð, með 400 hestafla
Mannheim vél. Öll nýtízku siglingatæki eru í skipinu og er það mjög vel útbúið.
Það var smíðað í Mandal í Noregi. Á skipinu er japanskur léttbátur með 24
hestafla vél. Hann er ætlunin að nota við athuganir á síldveiðum. Fjölmargir
Seyðfirðingar voru til að fagna skipinu er það kom til bæjarins. Stuðlaberg
gekk 11 sjómílur í reynsluför. Það fékk mjög gott veður á leiðinni heim.
Stuðlaberg mun væntanlega halda til síldveiða á miðvikudag og veiða með
kraftblökk.
Alþýðublaðið. 29 júní 1960.
Emil Ragnarsson með bjarghringinn af Stuðlabergi sem hann fann í fjörunni við Þóroddstaði á Miðnesi ásamt systur sinni Sólrúnu. (C) Sveinn Þormóðsson / Morgunblaðið.
Bjarghringur
fundinn
Fréttamenn Morgunblaðsins komu að Þóroddsstöðum á Miðnesi um
miðnættið í gærkvöldi. Þar hittu þeir fyrir Ragnar Guðjónsson og eiginkonu
hans, Viktoríu Finnbogadóttur. Ragnar er sjómaður á Stafnesinu G.K. 274. Ellefu
ára gamall sonur þeirra hjóna, Emil, gekk niður í fjöruna ásamt átta ára
gamalli systur sinni, Sólrúnu, á sunnudagsmorguninn milli kl. 10 og 11 og fundu
þau þá ýmislegt brak í fjörunni, Lestarlúgu, krókstjaka, árar og spýtnabrak úr
bát. Þau fóru strax heim og sögðu tíðindi. Ragnar brá skjótt við, en allir
héldu, að þetta væri brak úr mótorbátnum Geir goða, sem strandaði þarna í
fjörunni í vetur, þangað til tekið var eftir því, að liturinn á brakinu var
annar en á Geir goða. Þegar svo Emil litli og Sólrún, systir hans, fundu
bjarghring sídegis á mánudag um fjögurleytið með áletruninni, Stuðlaberg,
Seyðisfjörður, þá setti þegar illar grunsemdir að fólkinu. Þegar svo lýst var
eftir Stuðlaberginu síðdegis í gær, þóttust flestir vita, hvað gerzt hefði.
Ragnar sagði loks við fréttamann Mbl, að bjarghringi tæki oft út af skipum, og
ef ólag riði yfir gæti ýmislegt losnað, sem síðar kynni að reka á fjörur. Á
myndinni sést Emil með bjarghringinn. Myndin er tekin af ljósm. Mbl. Sveini
Þormóðssyni við Þóroddsstaði í nótt.
Morgunblaðið. 22 febrúar 1962.
Stuðlaberg ferst út af Stafnesi
Miðvikudaginn 21. febrúar s. l. var Slysavarnafélaginu
tilkynnt, að Seyðisfjarðarbátsins Stuðlabergs NS 102, hefði ekki orðið vart
síðan á laugardagskvöld, er síðast var haft samband við hann út af Selvogi. Um
leið og leit var hafin kom í ljós, að brak hafði fundizt á fjörunum milli
Garðskaga og Sandgerðis, þar á meðal merktur bjarghringur, og nót hafði sézt
mílu út af Stafnesi á mánudag. Á Stuðlaberginu voru 11 menn, en ekkert hefur
til þeirra spurzt. Það var bróðir stýrimannsins, Björn Þorfinnsson,, skipstjóri
á Heimaskaga, sem tilkynnti Henry Hálfdanarsyni, framkvæmdastjóra
Slysavarnafélagsins, að aðstandendur væru orðnir uggandi um bátinn, en
útgerðarstjórinn, Jón Jörundsson úr Keflavík, var jafnframt skipstjóri bátsins
og því um borð. Útgerðarfélagið er Berg h.f. á Seyðisfirði, og eigendur auk
skipstjórans Björgvin Jónsson á Seyðisfirði og Kristján Jörundsson, bróðir
skipstjórans, sem einnig var á Stuðlabergi. Er áhöfnin skráð í Njarðvíkum,
aðeins einn skipverja frá Seyðisfirði og samkvæmt upplýsingum frá útgerðinni á
Seyðisfirði hefur báturinn lagt upp hjá Bæjarútgerð Hafnarfjarðar. Stuðlaberg
var á síldveiðum fyrir Suðurlandi og er skipstjórinn hafði samband við Albert
Bjarnason, útgerðarmann í Keflavík á laugardagskvöld, var báturinn staddur út
af Selvogi á heimleið. Það kvöld var slæmt veður á þessum slóðum.
Mörg skip voru á þessari siglingarleið, bæði á undan bátnum og eftir, en enginn
virðist hafa heyrt neitt til hans eftir þetta. Slysavarnafélagið sendi strax út
tilkynningu um, að bátsins væri saknað og bað fólk á svæðinu frá Höfnum að
Garðskaga um að leita, svo og slysavarnadeildirnar á þessu svæði. Kom þá í
Ijós, að þarna hafði rekið heilmikið brak af þilfarinu, án þess að því væri
veitt athygli, þar sem ekki var saknað neins skips, þar á meðal bjarghringur
með nafni bátsins hjá Þóroddsstöðum, milli Garðskaga og Sandgerðis. Birtu var
farið að bregða er leitin hófst í fjörunni. Þá kom í ljós, að Jökulfellið hafði
kl. 8,30 á mánudagsmorgun tilkynnt að sézt hefði síldarnót liðlega mílu undan
Stafnesi. Hafði landhelgisgæzlan beðið Maríu Júlíu að huga að þessu, en hún
komst hvergi nærri vegna þess, hve þar var grunnt, krappur sjór og hvasst. Í
gær flaug svo landhelgisflugvélin Rán yfir og sá þá, að nótin var enn á
svipuðum stað, en lítið eitt innar. Þegar féttamaður Mbl, í gærkvöldi hitti
skipstjórann á Jökulfellinu, Arnór Gíslason, að máli, sagðist hann gera ráð
fyrir því, að nótin væri föst í botni. Þegar blaðið hafði fengið fregnir af
því, að föst nót hefði sézt liðlega mílu út af Stafnesi, rak okkur minni til að
þetta væri á sama stað og Hermóður fórst. Við hringdum því í Lárus
Þorsteinsson, skipherra, en það var hann, sem fann brakið, sem talið var vera
af Hermóði. Lárus staðfesti, að þetta væri sami staður og aðspurður um, hvernig
þarna háttaði, sagði hann, "Þetta er á venjulegri siglingaleið, þegar gott er í
sjó, en í verra veðri fara menn yfirleitt dýpra. Þar sem fer að grynnka verður
ákaflega kröpp alda,, en strax betra 3 mílum utar. Mér hefur fundizt að svona
1,7 ,mílur út væri sjólagið verst". Þeir sem fórust með Stuðlabergi, voru
þessir:
Jón Jörundsson, skipstjóri, Faxabraut 40B, Keflavík, 32 ára,, kvæntur og átti 4
börn.
Pétur Þorfinnsson, stýrimaður, Engihlíð 12, Reykjavík, 30 ára, trúlofaður með 2
börn á framfæri.
Kristján Jörundsson, 1. vélstjóri, bróðir skipstjórans,
Brekku, Ytri-Njarðvík, kvæntur en barnlaus.
Karl Jónsson, 2. Vélstjóri, Heiðarvegi 2, kvæntur.
Birgir Guðmundsson, matsveinn, Njálsgötu 22, Reykjavík, kvæntur og átti 4 börn.
Stefán Elíasson, háseti, Hafnarfirði, ókvæntur.
Guðmundur Ólason, Stórholti 22, Reykjavík, kvæntur, átti 3 börn.
Gunnar Laxfoss Hávarðsson, Kirkjuvegi 46, Keflavík, 17 ára.
Örn Ólafsson, Langeyrarvegi 9, Hafnarfirði, 22 ára, kvæntur en barnlaus.
Kristmundur Benjamínsson, Kirkjuteig 14, Keflavík, kvæntur og átti 3 börn.
Ingimundur Sigmarsson frá Seyðisfirði, 31 árs ókvæntur.
Ekki er blaðinu kunnugt um heimilisástæður hjá öllum.
Stuðlaberg NS 102 var stálbátur, 152 lestir að stærð, byggður í Noregi árið
1960 og hefur s. l. ár verið gerður út frá Suðurnesjum.
Sjómannablaðið Víkingur. 3 tbl. 1 mars 1962.
05.08.2018 08:24
Seglskipið Amerigo Vespucci í Reykjavíkurhöfn.
Ítalska seglskipið Amerigo Vespucci við Ægisgarð í gær.
Amerigo Vespucci við Ægisgarð í gær. (C) Þórhallur S Gjöveraa. 4 ágúst 2018.
Seglskipið Amerigo Vespucci
Ítalska
seglskipið Amerigo Vespucci sigldi að landi við Ægisgarð í Reykjavík snemma í
morgun og verður í höfn fram á mánudagsmorgunn. Skipið er þriggja mastra
seglskip sem hefur siglt um heiminn frá árinu 1931 og er talið eitt fallegasta
skip heims.
Seglskipið er notað sem kennsluskip fyrir
ítalska flotann og er Reykjavíkurhöfn þriðji viðkomustaður skipsins í árlegum
þjálfunarleiðangri. Á skipinu starfa 124 liðsforingjar sem hafa verið í þjálfun
frá því í byrjun júlí en heildarfjöldi á skipinu er um 450 manns.
Í þessari fyrstu heimsókn skipsins til landsins
er landsmönnum boðið að skoða skipið og kynnast litla samfélaginu um borð. Opið
verður fyrir almenning á morgun laugardag kl. 11-12:30 og 15-17. Einnig á
sunnudag kl. 10-12:30 og 15-21.
vísir.is 3 ágúst 2018.
02.08.2018 10:54
Skarðsvík SH 205. TFXY.
Báturinn var
við Færeyjar er búizt var við honum í höfn á Íslandi
Skip í hafi fyrir sunnan Ísland heyrðu um jólin, að
radíóstöðvar , hér á Íslandi voru að kalla á
vélbátinn Skarðsvík. Skarðsvík , svaraði aldrei, og árangurslaust var
báturinn kallaður upp. Það var ekki fyrr en síðdegis í gær, að loks heyrðist
svar frá bátnum. Hann var þá við Færeyjar. Það var Hornafjarðar-radíó, sem náði
sambandi við hann. Báturinn, sem er nýsmíðað skip, 85 tonn, lagði af stað frá
Fredrikssund í Danmörku á miðvikudaginn var. Með bátnum eru alls 9 menn, en
heimahöfn hans verður Sandur, og þaðan eru mennirnir. Þegar báturinn loks
svaraði í gær, hafði hann sýnilega hreppt hið versta veður í hafi, því að hann
var búinn að vera um það bil sex sólarhringa á leiðinni til Færeyja. Lá
báturinn þar í vari og ætluðu skipsmenn að bíða hagstæðara veðurs yfir hafið.
Líðan manna er góð um borð. Þegar báturinn lét úr höfn í Danmörku, stóðu vonir
til að hann myndi verða kominn til hafnar á Sandi að kvöldi annars í jólum.
Eigendur hins nýja báts eru þeir Kristján Guðmundsson skipstjóri frá
Stykkishólmi, Sveinbjörn Benediktsson símstöðvarstjóri á Sandi og Sigurður
Ágústsson alþingismaður.
Morgunblaðið. 28 desember 1960.
Skarðsvík SH 205 með fullfermi af síld á Siglufirði. (C) Hannes Baldvinsson.
Nýr 86 lesta
bátur til Rifs
Hellissandi í gær. Frá fréttaritara Þjóðviljans.
Ný bátur kom til Rifs í gærkvöld, fimmtudag, v.b. Skarðsvík SH 205. Báturinn er
87 lestir að Stærð, með 400 hestafla Manheim-vél, smíðaður í Frederikssund
Danmörku. Báturinn var sex sólarhringa á leiðinni til Íslands, en skipstjóri í
ferðinni var Kristján Guðmundsson. Skipstjóri á bátnum í vetur verður Sigurður
Kristjónsson. Eigendur eru Sveinbjörn Benediktsson, Sigurður skipstjóri o. fl.
Skarðsvík er annar báturinn, sem kemur til Rifs á seinni hluta þessa árs.
Þjóðviljinn. 31 desember 1960.
Skarðsvík SH 205 á leið til löndunar á Siglufirði. Ljósmyndari óþekktur.
Varðskipið Óðinn hefur tekið Skarðsvík í tog. Til vinstri er togarinn Þorkell máni RE 205 og ber Stapafell SH 15 í hann. Togarinn Júpíter er lengst til hægri. (C) Adolf Hansen.
Skarðsvík
sökk á heimleið úr leitarleiðangrinum
Skarðsvík SH 205, sá báturinn sem fyrstur komi að
gúmmíbátnum með hinum látnu mönnum tveim af Elliða, kom ekki aftur úr þeirri
leit. Leki kom að bátnum um 15 sjómílur V-NV af Öndverðarnesi um 2 leytið í gær
er hann var á leið heim og sökk hann. Áhöfnin, 6 manns, komist á gúmmíbátnum
yfir í Stapafellið. Sem dæmi um það hve ört lekinn magnaðist í Skarðsvík má
geta þess, að fréttaritari blaðsins á Hallissandi var ásamt fleiri Snæfellingum
staddur við Hvítárbrú í áotlunarbílnum til Reykjavíkur er Skarðsvíkin heyrðist
senda frá sér hjálparbeiðni, en bíllinn var ekki kominn lengra en í
Hvalfjörðinn er fólkið heyrði gegn um talstöðina að Skarðsvíkin var sokkin.
Skipstjórinn á Skarðsvík var hinn kunni aflakóngur þar vestra Sigurður Kristjónsson,
enda hafði báturinn skilað þriðjungi hærri afla en næsti bátur í þeim 19 róðrum
sem af eru þessari vertíð. Í gær áttum við símtal við Sigurð, sem skýrði frá
því sem gerðist;
Um 7 leytið á laugardagskvöldið fór Skarðsvíkin út til að leita að gúmmíbátnum
af Elliða ásamt öðrum Snæfellsnesbátum og var við leitina þar til báturinn
fannst. Þið komuð fyrstir báta að gúmmíbátnum, Sigurður? Báturinn var á hvolfi
og mennirnir lágu á botninum í sjó. Hann var á svipuðum slóðum og togarinn
sökk. Vindáttiin hafði breytt sér og hann rekið eitthvað til baka. Við vorum
búnir að leita innar en farnir að leita á þessum slóðum. Við létum skipherrann
á Óðni vita og hann tók líkin. Við voru rétt lagðir af stað í land, þegar
lekans varð vart frammi í og sjórinn flæddi inn. Við vorum nýbúnir að fá okkur
að borða þar, og tveir menn voru þarna enn. Hvað heldurðu að hafi komið fyrir.
Sló báturinn úr sér? Það tel ég útilokað. Þetta var miklu meiri leki en það.
Það var engu líkara en eitthvað mikið hefði opnazt. Hvernig var veðrið þá? Það
voru 6-7 vindstig og var að ganga upp í NA ofan í vestan sjó. Við sendum út
hjálparbeiðni. Óðinn var í ca. 15 mílna fjarlægð og var kominn eftir 45
mínútur. Hann tók okkur á slef. Það voru 10 mílur í var og hefðum við komist í
sléttan sjó, þá gat verið að hægt yrði að koma við dælu og það dygði.
En báturinn fylltist á hálfum öðrum klukkutíma. Þegar við þorðum ekki að vera
lengur um borð yfirgáfum við hann. Þá voru komnir til okkar togarinn Þorkell
máni og Júpiter, sem var með skipbrotsmennina af Elliða og Stapafellið, sem tók
okkur upp. Þess má geta í þessu sambandi að skipstjórinn á Stapafellinu er
Guðmundur Kristjónsson, bróðir Sigurðar á Skarðsvíkinni. Voruð þið komnir yfir
í Stapafellið, þegar Skarðsvikin sökk? Já, hún sökk 5 mínútum eftir að við
vorum farnir frá borði. Okkur gekk vel að komast yfir á gúmmíbátnum. En var
ekki orðin slæm aðstaða á Skarðsvíkinni, eftir að hún var farin að síga svona
mikið í sjóinn? Það hlýtur að hafa gengið yfir allt skipið. O, o, ekki svo ýkja
slæmt. Við vorum að græja okkur. En veðrið fór versnandi.
Skarðsvíkin var nýr bátur, kom til landsins í ársbyrjun 1961. Hann var 87 smál.
að stærð og búinn fullkomnustu tækjum. Er það mikið áfall fyrir byggðarlagið á
Rifi að missa þetta góða skip undan þessum mikla aflamanni sem Sigurður Kristjónsson
er, Áður en hann tók við Skarðsvíkinni var hann með Ármann og síðan Stíganda
frá Ólafsfirði og alltaf manna aflahæstur. Áhöfnin á Skarðsvíkinni var öll frá
Rifi. Mennirnir voru:
Sigurður Kristjónsson, skipstjóri.
Friðjón Jónsson stýrimaður.
Sigurður Árnason vélstjóri.
Almar Jónsson, matsveinn.
Guðmundur Guðmundsson, háseti.
Sigurjón Illugason, háseti.
Morgunblaðið. 13 febrúar 1962.
01.08.2018 13:29
Reykjavíkurhöfn og skipin í morgunsólinni.
- 1
- 2