26.05.2019 18:14

Gömul mynd frá Dalvík.

Þessi mynd frá Dalvík er tekin fyrir margt löngu síðan. Báturinn hægra megin hét Valur EA 110, 6 brl, smíðaður í Skipasmíðastöð Nóa Kristjánssonar á Akureyri árið 1954 fyrir bræðurna Agnar, Gunnar og Þóri Stefánssonum og Björn Þorleifsson á Dalvík. Báturinn fórst í mannskaðaveðrinu 9 og 10 apríl árið 1963 og með honum bræðurnir Gunnar Stefánsson og Sigvaldi Stefánsson frá Dalvík. Það voru 16 íslenskir sjómenn sem fórust í þessu hræðilega mannskaðaveðri.


Frá Dalvík. Valur EA 110 til hægri.                                                                      Ljósmyndari óþekktur. 

   4 menn hafa farist og 7 saknað
     eftir fárviðrið fyrir Norðurlandi

Flestir voru bátarnir út af Eyjafirði, og var rokið svo mikið að innsiglingin til Siglufjarðar og Ólafsfjarðar lokaðist og urðu allir bátarnir að leita inn á Eyjafjörð. Þar var varðskipið Ægir þeim til aðstoðar. Samkvæmt viðtali við Akureyri í morgun skall óveðrið yfir í gær eins og hendi væri veifað og kom flestum mjög á óvart því veður var gott í gærmorgun og bátar á sjó úr öllum Eyjafjarðarhöfnum. Verst urðu Dalvíkingar úti, en þaðan fórust þrjár trillur í gær, þó björguðust mennirnir af þeim nema einni, bátnum Val, sem á voru tveir bræður, Gunnar og Sigvaldi Stefánssynir. Þeir voru norður af Gjögrum þegar veðrið brast á, höfðu seinna samband við m.s. Esju sem var á vesturleið og báðu um að mega fylgjast með henni fyrir Gjögra. Allt í einu hvolfdi bátnum og gátu skipverjar á m.s. Esju dregið annan manninn, Sigvalda, meðvitundarlausan úr sjó, en Gunnar bróður hans sáu þeir aldrei. Fór Esja með Sigvalda til Akureyrar, en hann komst aldrei til meðvitundar og þegar til hafnar kom, úrskurðaði læknir hann látinn. Sigvaldi heitinn lætur eftir sig konu og þrjú börn. Gunnar bróðir hans var ókvæntur. Þá er enn eins báts frá Dalvík saknað, Hafþórs, sem á er 5 manna áhöfn. Það síðasta sem til hans er vitað var það að hann sást norður af Gjögrum um kl. 4 í gærdag. Síðan hefur ekki til hans sézt. Skip hafa leitað bátsins í alla nótt en árangurslaust. Skipstjóri á Hafþóri er Tómas Pétursson. Áhöfnin er öll frá Dalvík. Alls voru þrír þilfarsbátar og margar trillur á sjó frá Dalvík þegar óveðrið brast á, en aðrir bátar en framangreindir fjórir björguðust.

Vísir. 10 apríl 1963.


Flettingar í dag: 3065
Gestir í dag: 173
Flettingar í gær: 4151
Gestir í gær: 315
Samtals flettingar: 1555980
Samtals gestir: 416752
Tölur uppfærðar: 24.9.2019 08:32:30