Færslur: 2016 Nóvember

15.11.2016 11:45

97. Baldur EA 770. TFNH.

Baldur EA 770 var smíðaður hjá East Anglian í Oulton Broad í Lowestoft í Englandi árið 1943 sem tundurduflaslæðari fyrir breska sjóherinn og bar fyrst nafnið MMS 1006. Eik og fura. 366 brl. 500 ha. Superior díesel vél. Skipið var selt árið 1947, Oswald Aamodt í Ósló í Noregi, hét Trippesta. Selt í júní árið 1947, Stjörnum h/f á Dalvík, hét Pólstjarnan EA 770. Breytt í fiskiskip sama ár og stundaði síldveiðar með góðum árangri. Selt árið 1953, Baldri h/f á Dalvík, hét Baldur EA 770. Skipið var selt árið 1957, Jóni Franklín sem breytti skipinu í flutningaskip. Baldur var í ýmsum flutningum, m.a. sementsflutningum frá Sementsverksmiðjunni á Akranesi til hafna úti á landi. Var einnig í vikurflutningum frá Snæfellsnesi til Reykjavíkur fyrir Jón Loftsson h/f. Var í tunnuflutningum milli hafna innanlands og tunnuflutningum frá Noregi til hafna úti á landi. Selt árið 1963, Kristjáni Eiríkssyni í Reykjavík, hét Hildur RE 380. Selt 24 apríl 1967, Guðmundi Antoni Guðmundssyni í Kópavogi og Svavari Guðmundssyni í Reykjavík. Skipið sökk út af Gerpi 21 mars 1968 þegar það var á leið erlendis með 1.800 tunnur af saltsíld. Áhöfnin, 7 mönnum var bjargað um borð í varðskipið Þór.

Baldur EA 770 í tunnuflutningum.                                                             Ljósmyndari óþekktur.

Síldveiðiskipið Baldur EA 770.                                                                  Ljósmyndari óþekktur. 


Hildur RE 380 að sökkva. Áhöfnin komin í björgunarbátinn.                           (C) Morgunblaðið.


Skipið að hverfa í djúpið.                            (C) Morgunblaðið.

          Vs. Hildur sökk - mannbjörg

Vélskipið Hildur RE 380 sökk í gærmorgun 25.8 sjómílur réttvisandi 287 gráður frá Gerpi. Skipverjar höfðu um nóttina kallað til nálægs varðskips og beðið um að haft yrði auga með sér, þar eð leki væri kominn að skipinu. Var varðskip á staðnum er skipið sökk og hafði þá bjargað áhöfninni, 7 manns. Flutti varðskipið mennina til Seyðisfjarðar og munu þeir hafa gist á Egilsstöðum i nótt. Hildur var smíðuð árið 1943 og léleg orðin. Hildur var á leið utan með 1800 tunnur af saltsíld. Um kl. 01 í fyrrinótt kallaði áhöfnin út og sagði að leki væri kominn að skipinu. Varðskipið Þór heyrði kallið og fór þegar af stað á vettvang. Gaf skipshöfn Hildar þá upp staðarákvörðunina 42 til 45 sjómílur suðaustur  af Dalatanga og um kl. 05 sáu varðskipsmenn ljósin um borð í Hildi. Á leið sinni til Hildar hafði varðskipið miðað Hildi út nokkrum sinnum og um kl. 05.10 var það komið á vettvang. Hildur sigldi með hægri ferð upp í vind og sjó, en 5 til 6 stiga vindur var af norðnorðaustan. Sjólag var NNA og 5 til 6 metra öldulhæð. Þegar Þór kom að skipinu var það 26 sjómílur austsuðaustur af Gerpi og voru vélarnar í gangi. Þremur stundarfjórðungurn síðar bað áhöfn Hildar varðskipið um fylgd til lands og skömmu síðar var dæla frá varðskipinu sett um borð. Var Hildur þá orðin mjög sigin og lá meira fram en eðlilegt gat talizt. Dæla varðskipsins vann ekki með fullum afköstum, þar eð mikil óhreinindi settust í síurnar og um fimmtán mínútum yfir átta var önnur dæla sett um borð. Dælurnar virtust ekki hafa undan lekanum, sem kominn var að skipinu. Klukkan 08.45 komu 3 skipverja af Hildi um borð í Þór, samkvæmt eigin ósk. Fluttu varðskipsmenn þá á báti sínum milli skipanna og 15 mínútum síðar tilkynnti skipstjórinn Magnús Einarsson, að hann yrði að yfirgefa skipið. Um kl. 09:15 var öll skipshöfn Hildar komin í varðskipið. Var hún flutt á bátum varðskipsmanna. Þegar þannig var komið ákvað skipherra varðskipsins, Þröstur Sigtryggsson, að bíða átekta og athuga með björgun Hildar, sykki hún ekki fljótlega. Sú bið reyndist árangurslaus, þvi að kl. 10.27 sökk Hildur og hvarf sjónum þeirra, sem voru um borð í Þór. Staðarákvörðun var þá gerð og reyndst hún réttvísandi 287 gráður í fjarlægð 25.8 frá Gerpi. Þegar Hildur sökk, flaut upp talsvert af lausu braki og tilkynnti varðskipið strandstöðvum það. Er skipið hvarf í djúpið sáu varðskipsmenn gúmbát blásast upp yfir staðnum og innbyrtu þeir hann ásamt gúmbát, er skipbrotsmenn höfðu áður blásið upp. Um 11-leytið hélt varðskipið áleiðis til Seyðisfjarðar, þangað kom það um þrjú- leytið. Skipibrotsmenn héldu með snjóbíl yfir Fjarðarheiði og gistu á Egilsstöðum í nótt. Vélskipið Hildur RE 380  var smíðað í Lowestoft árið 1943 og upprunalega sem korvetta, 366 vergar lestir. Eigandi var Guðmundur A. Guðmundsson og fleiri í Kópavogi. Guðmundur var 1. vélstjóri á skipinu. Fyrir ekki alllöngu strandaði Hildur við Ingólfshöfða. Komst hún á flot sjálfkrafa, en Landhelgisgæzlan leitaði hennar og fann hana inni á Eskifirði. Morgunblaðið reyndi í gær að ná tali af skipstjóranum á Hildi, en hann kvaðst ekkert segja, fyrr en að loknum sjóprófum.

Morgunblaðið. 22 mars 1968.

14.11.2016 11:16

B. v. Júlí GK 21. TFVD.

Júlí GK 21 var smíðaður hjá Cochrane & Sons Ltd í Selby á Englandi árið 1947 fyrir Bæjarútgerð Hafnarfjarðar í Hafnarfirði. 657 brl. 1.000 ha. 3 þennslu gufuvél. Skipið var sjósett 24 janúar árið 1947 og kom til heimahafnar hinn 15 nóvember sama ár. Togarinn fórst á Nýfundnalandsmiðum 7 eða 8 febrúar árið 1959 með allri áhöfn, 30 mönnum.


Júlí GK 21 í Hafnarfjarðarhöfn stuttu eftir komuna til landsins.                    (C) Guðbjartur Ásgeirsson.


Togararnir Júlí GK 21 og Kaldbakur EA 1 við innri bæjarbryggjuna í Neskaupstað stuttu eftir 1950. Við bryggjuna eru líka Draupnir NK 21 og að innan verðu eru Freyfaxi NK 101 og Hrafnkell NK 100.
                                                                                                                       (C) Björn Björnsson.


Júlí GK 21.                                                                                          (C) Minjasafnið á Ísafirði.

          Eitt mesta sjóslys á þessari öld

 Öll von er talin úti um að Júlí sé lengur ofansjávar

Síðdegis í gær tilkynnti Bæjarútgerð Hafnarfjarðar, að togarinn Júlí væri talinn af með allri áhöfn, 30 mönnum. Leit er nú hætt að togaranum, en hún hófst að morgni 10. þessa mánaðar og í tilkynningu Bæjarútgerðarinnar segir, að viðstöðulaust hafi síðan verið leitað með flugvélum og skipum á meir en 70,000 fersjómílna svæði. Fjöldi flugvéla hafði tekið þátt í leitinni að Júlí, björgunarflugvélar frá Kanada, Bandaríkjunum, Nýfundnalandi og héðan frá íslandi, svo og bandarískar flotaflugvélar. Á sjó leituðu veðurskip og stórir rússneskir verksmiðjutogarar. Auk hins fyrrgreinda leitarsvæðis á Nýfundnalandsmiðum var og leitað á stóru aðliggjandi svæði sunnar, á þeim slóðum, sem kanadísku skipin fórust, er einnig týndust í þessu ægilega mannskaðaveðri. Leit að þeim var hætt fyrir nokkrum dögum. Allur þorri skipsmanna á Júlí voru ungir menn, yngsti maðurinn aðeins 16 ára, en hinn elzti 48 ára. Flestir á aldrinum milli tvítugs og þrítugs. Af þeim voru 19 frá Reykjavík og fimm frá Hafnarfirði. Í hópnum voru 12 heimilisfeður, er láta eftir sig konur og börn. Með hvarfi togarans Júlí hafa 39 börn á aldrinum nokkra vikna til 15 ára misst feður sína. Þá voru í hóp hinna vösku sjómanna á Júlí nokkrir menn er ýmist voru fyrirvinna móður eða foreldra. Þetta er eitt hið mesta sjóslys, sem orðið hefur á íslenzku skipi á þessari öld, en fleiri fórust þó í hinu svonefnda Þormóðsslysi 1943, er 31 maður drukknaði. Í Halaveðrinu 1925, er tveir togarar fórust, drukknuðu 68 menn, og með togaranum Max Pemberton, er hvarf árið 1944, fórust 29 menn. Forustugrein Morgunblaðsins í dag fjallar um hinn mikla mannskaða er hér hefur orðið. Hér fara á eftir nöfn skipverja á togaranum Júlí:
Þórður Pétursson, skipstjóri, Grænuhlíð 8, Reykjavík, 42 ára. Hann lætur eftir sig 3 börn: 14 ára, 11 og 6 ára. Faðir hans er á lífi. Hafliði Stefánsson, 1. stýrimaður, Köldukinn 6, Hafnarfirði, 31 árs. Kvæntur með 2 börn, 5 ára og 3ja ára. Móðir á lífi. Þorvaldur Benediktsson, 2. stýrimaður, Brekkugötu 14, Hafnarfirði, 24 ára, ókvæntur. Hann var sonur Benedikts Ögmundssonar skipstjóra á togaranum Júní frá Hafnarfirði. Stefán Hólm Jónsson 1. vélstjóri, Eskihlíð 4 C, Reykjavík, 48 ára. Lætur hann eftir sig 5 börn tvö innan fermingaraldurs. Guðlaugur Karlsson, 2. vélstjóri, Garðavegi 10, Hafnarfirði, 20 ára. Hann var fyrirvinna móður sinnar. Runólfur Viðar Ingólfsson, 3. vélstjóri, Langholtsvegi 137, Reykjavík, 23 ára. Hann var ókvæntur en móðir hans býr á Akranesi. Hörður Kristinsson, loftskeytamaður, Langeyrarvegi 9, Hafnarfirði, 29 ára. Kvæntur og lætur eftir sig þrjú börn ung. Andrés Hallgrímsson, bátsmaður, Mávahlíð 27, Reykjavík, 35 ára, ókvæntur, en fyrirvinna móður sinnar. Kristján Ólafsson, 1. matsveinn Efstasundi 85, Reykjavík, 24 ára. Kvæntur og lætur eftir sig þrjú börn, 4 ára, 1 1/2 árs og 6 mánaða. Átti foreldra á lífi. Viðar Axelsson, 2. matsveinn, Njarðargötu 29, Reykjavík, 23 ára. Kvæntur og átti 1 barn 3 ára. Átti foreldra á lífi. Svanur Pálmar Þorvarðarson, kyndari, Laugarnesbúðum 31, Reykjavík, 19 ára. Ókvæntur. Hann var fyrirvinna móður sinnar. Skúli Benediktsson, kyndari, Ránargötu 6, Reykjavík, 24 ára. Kvæntur og lætur eftir sig 6 ung börn, hið elzta 5 ára. Átti fósturforeldra og foreldra á lífi. Ragnar Guðjón Karlsson, netamaður, Höfðaborg 21, 39 ára. Kvæntur og lætur eftir sig þrjú börn 13, 11 og 7 ára. Átti fósturmóður á lífi. Ólafur Ólafsson, netamaður, Nýlendugötu 7, Reykjavík. Ókvæntur. Sigmundur Finnsson, netamaður, Tripólibúðum 25, Reykjavík, 25 ára. Ókvæntur, en lætur eftir sig tvö börn. Magnús Guðmundsson, háseti, Trípólibúðum 25, Reykjavík, 44 ára. Kvæntur. Hann var stjúpfaðir Sigmundar og lætur eftir sig 4 stjúpbörn, uppkomin. Móðir hans er á Súgandafirði. Benedikt Sveinsson, netamaður, Njálsgötu 77, Rvík, 27 ára. Ókvæntur. Bjó með móður sinni. Jóhann Sigurðsson, netamaður, Laugavegi 53 B, Rvík, 44 ára. Kvæntur og lætur eftir sig fjögur börn, 15, 14, 11 og 4ra ára. Ólafur Snorrason, háseti, Njálsgötu 87, Rvík, 34 ára. Fósturforeldra átti hann á Patreksfirði og móður á lifi. Björn Heiðar Þorsteinsson, háseti, Ránargötu 24, Akureyri, 31 árs. Ókvæntur og bjó hjá foreldrum sínum á Akureyri. Jón Geirsson, háseti, Borgarnesi, 21 árs. Ókvæntur, í foreldarhúsum. Magnús Gíslason, háseti, Lækjarkinn 2, Hafnarfirði, 31 árs. Ókvæntur og eru foreldrar hans á Elliheimilinu Grund hér í Rvík. Magnús Sveinsson, háseti, Rauðarárstíg 40, Rvik, 21 árs. í heimili fósturmóður sinnar. Jón Haraldsson, háseti, Hlíðarvegi 11, Kópavogi, 16 ára. Hann var einkabarn foreldra sinna. Þorkell Árnason, háseti, Sörlaskjóli 20, Rvík, 38 ára. Lætur hann eftir sig unnustu og ungt barn. Foreldrar eru norður á Þórshöfn. Guðmundur Elíasson, háseti, Vitateig 5, Akranesi, 30 ára. Kvæntur og átti fjögur börn á aldrinum 10, 7, 5 og 2ja ára. Foreldrar hans búa á Akranesi. Benedikt Þorbjörnsson, háseti, Lokastíg 28, Rvík, 27 ára. Ókvæntur. Faðir á lífi. Aðalsteinn Júlíusson, háseti, Hítarnesi Hnappadalssýslu, þar sem faðir hans nú býr. Hann var 27 ára og ókvæntur. Björgvin Jóhannsson, háseti, (stud. med.), Höfðaborg 12, Rvík, 29 ára og lætur eftir sig tvö mjög ung börn. Móðir á lífi. Sigurður Guðnason, háseti, Kirkjubraut 28, Akranesi, 44 ára. Kvæntur en barnlaus. Foreldrar hans búa á Suðureyri. í gærkvöldi var skipshafnarinnar á Júlí minnzt í Ríkisútvarpinu. Flutti biskup íslands, hr. Ásmundur Guðmundsson, ávarp og bæn. Felld var niður dagskrá útvarpsins að fréttum undanskildum, en þess í stað leikin sorgarlög og sígild tónlist.

Morgunblaðið. 18 febrúar 1959.

                         ÞJÓÐ í SORG

Í rúma viku hefur íslenzka þjóðin beðið milli vonar og ótta tíðinda af leit þeirri, sem staðið hefur yfir að togaranum Júlí frá Hafnarfirði. Fjöldi heimila hefur hlustað eftir fréttum af örlögum eiginmanna, feðra, bræðra og annarra ástvina. Ótti og eftirvænting hefur mótað líf fjölda fólks þessa löngu viku. Allan þennan tíma má heita að stormur og hríðar hafa geysað vestur á miðum Nýfundnalands, þar sem hópur íslenzkra togara var að veiðum fyrir rúmlega viku síðan. Íslenzku togararnir hafa komið heim hver á fætur öðrum klakastorknir og sumir jafnvel brotnir og bramlaðir eftir stórsjóa og áföll á heimleiðinni. Sjómönnum hefur verið fagnað innilega og mikils feginleika hefur orðið vart meðal almennings, þegar hvert einstakt skip hefur náð heimahöfn.

Morgunblaðið. 18 febrúar 1959.


13.11.2016 10:40

M. s. Eldborg MB 3. TFBM.

Eldborg MB 3 var smíðuð hjá Moss værft A/S í Moss í Noregi árið 1932. Stál. 280 brl. 400 ha. Bolinder vél. Eigandi var Sameignarfélagið Grímur í Borgarnesi frá 6 september 1934. 16 júní árið 1950 er Eldborg h/f í Borgarnesi eigandi skipsins. Á árunum 1952 til 1956 var Eldborg í póstferðum milli Reykjavíkur, Akraness og Borgarness og flutti þá póst, vörur og farþega. Selt til Noregs í desember árið 1956.


Eldborg MB 3 að leggjast við bryggju í Djúpavík.                                 Ljósmundari óþekktur, G.Á ?

             Aflahæsta síldveiðiskipið

Aflahæsta skip síldveiðiflotans á þessu sumri varð Eldborg Mb. 3, skipstjóri Ólafur Magnússon Borgarnesi. Hann varð einnig aflakóngur síldveiðanna í fyrra, aflaði þá 30.300 mál, en í sumar varð aflinn 26.624 mál. Slíkum afla er ekki náð með hangandi hendi, enda er Ólafur afbragðs dugnaðar formaður, og hefir ávalt haft úrvals skipshöfn, enda þekktur meðal allra sjómanna fyrir aflasæld og góða formennsku. En ólafur hugsar um fleira, jafnhliða aflaafköstunum, hann berst af alhug og einbeitni fyrir velferð sjávarútvegsins, og fylgist af lífi og sál með félagsmálum sjómannastéttarinnar, enda er hann 100% sjómaður sjálfur, í orðsins beztu merkingu. Megi velferð og gifta fylgja starfi hans.

Víkingur 10 tbl. 1944.

   Eldborgin laskaði skrúfuna í ísreki við          Borgarnes í gær  

Þegar flóabáturinn Eldborg var að leggja frá bryggju í Borgarnesi í gærdag síðdegís lenti hún í ísreki og laskaði skrúfuna svo, að ekki þótti fært að halda suður, og var henni lagt við akkeri þar efra. í henni er mikil mjólk. Ekki mun skrúfan vera brotin, en vélin gengur svo þungt að ekki er talið hættulaust að sigli henni suður. Þó mun skipstjórinn hafa í hyggju að fara á mjög hægri ferð beint til Reykjavíkur í dag, ef veður hægir. Áætlunarbílar Norðurleiðar tepptust í Hvalfirði og voru með 30 farþega. Sneru þeir til Akraness og átti að senda fólkið með Eldborginni þaðan til Reykjavíkur, en þar sem ekkert varð af för hennar, er fólk þetta teppt á Akranesi. Ekki er vitað, til hvaða ráða verður gripið með ferðir yfir flóann í dag.

Tíminn. 22 janúar 1955.

12.11.2016 09:03

L. v. Freyja RE 38. TFOE.

Línuveiðarinn Freyja RE 38 var smíðuð í Kristiansand í Noregi árið 1901. Stál. 67 brl. 80 ha. 2 þennslu gufuvél. Fyrstu eigendur voru Jón Jónsson og Sigurd Mikkelsen í Vestmannaeyjum frá 27 ágúst árið 1929, skipið hét Havörnen VE 290. Skipið var leigt til sjómælinga sumarið 1930. Skipið var selt 23 mars 1932, Samvinnufélaginu Haferninum í Hafnarfirði. Selt 24 október sama ár, Fiskveiðafélaginu Freyju í Reykjavík, hét Freyja RE 38. Ný vél (1943) 132 ha. Kelvin díesel vél. Skipið var endurmælt sama ár, mældist þá 71 brl. Skipið var talið ónýtt og tekið af skrá 1 júní árið 1948.

Freyja RE 38 á landleið með nótabátinn í togi.                                              Ljósmyndari óþekktur.

Haförninn VE 290.                                                                                  (C) Gissur Ó Erlingsson.


       Havörnen við sjómælingar sumarið 1930

"Árin 1929 og 1930 hefur verið unnið að sjómælingum við strendur Íslands undir umsjón Friðriks V. Ólafssonar skipstjóra, og var til þess leigður gufubáturinn "Haförninn". Voru í þessu skyni reistar vörður fyrri siglingaleiðirnar og hnattstaða þeirra ákveðin. Árið 1930 var undir stjórn Kaptajnlojtnant H. Madsen byrjað á að undirbúa fyrir sjómælingar á stóru óuppmældu svæði fyrir Norður-Ströndum, sem einu máli er nefnt Strandabrekar. Var allan júlímánuð unnið að mælingum á landi og vörðubyggingum á svæðinu frá Reykjarfirði syðra og norður fyrir Smiðjuvík. Í ágústmánuði var svo mæld og afmörkuð leið inn á Kollafjörð við Steingrímsfjörð, en vegna óhagstæðrar veðráttu fyrir norðan land náðist eigi að gera meira á þessum slóðum."
"Haförninn" var lítill línuveiðari, 70,81 tonn að rúmmáli skv. mælingabréfi, svo sem tekið er fram í skipshafnarskrá, og knúinn tveggja strokka gufuvél. Ketillinn var kolakyntur með tveimur eldhólfum sem sneru að vélarrúminu, enda önnuðust vélstjórarnir kyndinguna, svo sem almennt tíðkaðist á svo litlum skipum.

Sjómælingar á Húnaflóa sumarið 1930.
Víkingur. 2 tbl. 1 júní 1996.



11.11.2016 09:07

M. b. Hafalda NK 56.

Hafalda NK 56 var smíðuð í Korsör í Danmörku árið 1932. Eik, beiki og fura. 29 brl. 80 ha. June Munktell vél. Eigandi var Útgerðarfélagið Hafalda í Neskaupstað ( Ingvar Pálmason skipstjóri og fl.) frá 6 maí sama ár. 14 maí 1937 var Útvegsbanki Íslands skráður eigandi bátsins. Seldur 28 mars 1938, Hannesi Hanssyni í Vestmannaeyjum, hét Hafalda VE 7. Seldur 8 júní 1948, Guðna Sumarliðasyni og Sumarliða Sumarliðasyni í Ólafsvík, Jóni Jörundssyni Vaðstakksheiði, Snæfellssýslu, Soffaníasi Guðmundssyni og Lúðvík Kristjánssyni í Reykjavík, báturinn hét Hafalda SH 79. Seldur árið 1953, Víglundi Jónssyni í Ólafsvík, hét Orri SH. Slitnaði frá bryggju í ofsaveðri og rak upp í klappir við brimbrjótinn í Ólafsvík 30 janúar 1954. Einn maður var um borð, Þórður Halldórsson frá Dagverðará. Fróði SH 5 var mannaður til leitar og björguðu Fróðamenn Þórði, sem hafði klifrað upp í mastrið og bundið sig þar fastan. Báturinn eyðilagðist og brotnaði fljótlega í spón.


Hafalda NK 56 nýsmíðuð í Korsör í Danmörku 1932.                                (C) Svanbjörn Stefánsson.


Hafalda NK 56 bíður löndunar á Siglufirði.            Ljósmyndari óþekktur.

       Skipverja af m.b. Orra SH bjargað

30 janúar árið 1954 skall á suðaustan aftakaveður við landið sunnan og vestanvert. Allir bátar, sem verið höfðu í róðri, náðu þó heilir til hafnar, en í Ólafsvík varð það óhapp að vélbáturinn Orri SH , sem lá þar við bryggju, slitnaði frá. Einn maður, Þórður Halldórsson að nafni, var um borð í bátnum. M.b Orra rak upp í klappirnar vestan við brimbrjótinn í Ólafsvík og sökk þar samstundis. Stóð framsiglutréð eitt upp úr og gat þórður bundið sig við það.
Sökum mikils dimmviðris vissu menn í fyrstu ekki hvert bátinn hafði rekið, en vélbáturinn Fróði SH 5 var þegar mannaður til leitar. Stjórnuðu bræðurnir Tryggvi og Víglundur Jónssynir leitinni, en Víglundur átti Orra. Þegar þeir fundu bátinn og sáu manninn í siglutrénu, lögðu þeir Fróða þegar að honum og tókst að bjarga honum. Mátti ekkert út af bera til þess að ekki færi illa, þar sem fróði tók niðri er honum var siglt að Orra. Þórður Halldórsson þótti sýna mikið þrek í hrakningum þessum og jafnaði hann sig brátt eftir volkið.

Þrautgóðir á raunastund. V bindi.


.

10.11.2016 11:41

Palmen RE 14. LBSK.

Kútter Palmen var smíðaður í Goole á Englandi árið 1873. Eik og fura. 69 brl. Eigendur voru Jes Zimsen, Björn Guðmundsson og Þorsteinn Guðmundsson í Reykjavík frá 20 júlí 1898. Þeir keyptu skipið frá Mandal í Noregi. Skipstjóri var Jón Þórðarson frá Gróttu. Skipið var selt 27 apríl 1905, Benedikt Stefánssyni í Ólafsvík. Selt 10 mars árið 1908, Guðjóni Pjeturssyni, Vorhúsum, Gullbringu og Kjósarsýslu. Engar frekari upplýsingar að finna um kútter Palmen.


Kútter Palmen. Skipið gæti verið á Ísafirði.                                     (C) Handel & Söfart museets.dk


Palmen F 49. Fékk síðar skráningarnúmerið RE 14.                                      Mynd úr Skútuöldinni.


        Jón Þórðarson skipstjóri frá Gróttu.

Það var í lok vetrarvertíðar árið 1899, að kútter Palmen sigldi inn á heimahöfn sína, Reykjavík. Slíkur atburður hefði ekki þótt neinum tíðindum sæta á sjálfri skútuöldinni, ef ekki hefði staðið sérstaklega á um komu skipsins. Sjálfur skipstjórinn, Jón Þórðarson frá Gróttu, hafði andazt skyndilega á hafi úti í blóma lífsins, aðeins fertugur að aldri, og lá nú liðið lík í káetu sinni.

Þessar línur hér að ofan eru úr minningargrein um Jón Otta Jónsson 1893-1973, skipstjóra sem birtist í sjómannablaðinu Víkingi í ágúst árið 1973, en Jón skipstjóri frá Gróttu var faðir hans.

09.11.2016 10:41

Jarlinn GK 272. LCDG. / TFQE.

Línuveiðarinn Jarlinn GK 272 var smíðaður hjá Thomas Charlton & Co Ltd í Grimsby á Englandi árið 1890 fyrir John H Charlton í Grimsby, hét Stanley Africanus GY 267. Stál. 190 brl. 250 ha. 2 þennslu gufuvél. Árið 1910 var skipið í eigu Weston W Crampin í Grimsby. Skipið var selt til Gautaborgar í Svíþjóð, óvíst hvenær. Hét þar Anders. Árið 1925 er skipið keypt til Íslands og er eigandi þess þá h/f Hrogn & Lýsi í Reykjavík, hét Anders RE 263. Skipið var selt árið 1930, h/f Hljer í Reykjavík (Magnúsi Vagnssyni á Ísafirði ?), hét Hljer RE 263. Selt 31 maí 1930, Kolbeini Finnssyni og Þorvaldi Jakobssyni í Reykjavík, skipið hét Jarlinn RE 263. Selt 17 apríl 1935, Helga Pálssyni á Akureyri, hét Jarlinn EA 590. Selt 5 janúar 1940, Sameignarfélaginu Jarlinum (Óskari Halldórssyni og börnum hans) 6 júní 1941 eignast Björn Ólafsson hlut í skipinu, fær þá nafnið Jarlinn GK 272. Þann 21 ágúst 1941 lagði skipið af stað frá Ísafirði áleiðis til Englands með ísfiskfarm. Jarlinn seldi afla sinn í Fleetwood 1 september. Skipið lagði af stað frá Fleetwood þann 3 september áleiðis til Vestmannaeyja en það kom aldrei fram. Skipið fórst með allri áhöfn, 11 mönnum. Það kom síðar fram að þýski kafbáturinn U-141, sökkti Jarlinum að kvöldi 5 september 1941 um 200 sjómílur norðvestur af Stornoway í Skotlandi.


Jarlinn EA 590. Myndin er tekin í Reykjavíkurhöfn árið 1940.                     Ljósmyndari óþekktur.


Jarlinn GK 272. Líkan Gríms Karlssonar.                                                 (C) Þórhallur S Gjöveraa.


        Línuveiðarinn "Jarlinn" ferst.

Talið er nú fullvíst, að línuveiðarinn "Jarlinn" hafi farizt með allri áhöfn á heimleið frá Englandi. "Jarlinn fór með ísfiskfarm frá Ísafirði 21. ágúst áleiðis til Englands. Á leiðinni út kom hann við í Vestmannaeyjnm og hélt af stað þaðan 23. ágúst. Þann 1. sept. seldi hann afla sinn í Fleetwood, og hélt þaðan af stað heimleiðis miðvikudaginn 3. sepl., og ætlaði þá beina leið til Vestmannaeyja. Síð- an hefur ekkert af skipinu spurzt né áhöfn þess, og sennilegt er, að eigi þurfi að vænta fregna af því, með hverjum hætti skipið hefur farizt. "Jarlinn" var keyptur hingað til landsins árið 1925. Hann var 190 rúml. brúttó, með 250 hestafla gufuvél, og því einn með stærstu hérlendum línuveiðurum. Eigandi skipsins var sameignarfélagið "Jarlinn", eða Óskar Halldórsson og börn hans. Einn eigandinn, Theódór, sonur Óskars, var með skipinu. Með "Jarlinum" fórust þessir menn: Jóhannes Jónsson, skipstjóri, Öldugötu 4, Reykjavík. Fæddur 22 apríl 1877. Ókvæntur. Guðmundur Mátthíasson Thordarson, stýrimaður. búsettur í Kaupmannahöfn, en var staddur í Englandi, þegar Danmörk var hertekin. Fæddur í Reykjavík 26. janúar 1904, Kvæntur og lætur eftir sig 1 barn. Eyjólfur Björnsson, 1. vélstjóri, óðalsbóndi í Laxnesi í Mosfellssveit. Fæddur 23. febr. 1883. Kvæntur og átti 3 börn. Jóhann Sigurjónsson, 2 vélstjóri, Siglufirði. Fæddur 12. febr. 1897. Kvæntur. Átti 2 börn og 1 fósturbarn. Sigurður Gíslason, kyndari, Óðinsgötu 16, Rvík. Fæddur 21. jan. 1915. Ekkjumaður. Átti 2 börn. Dúi Guðmundsson, kyndari, Siglufirði. Fæddur 1. febrúar 1901. Ókvæntur. Átti 1 barn og aldraða foreldra. Halldór Björnsson, matsveinn, Ingólfsstr. 21, Rvík. Fæddur 13. ágúst 1911. Ókvæntur. Konráð Ásgeirsson, háseti, Bolungavík. Fæddur 22. júlí 1912. Ókvæntur. Ragnar Guðmundsson, háseti, Gufá, Mýrasýslu. Fæddur 13. ágúst 1911. Ókvæntur. Sveinbjörn Jóelsson, háseti, Skólavörðustíg 15, Reykjavík. Fæddur 23. nóvember 1923. Ókvæntur. Theódór Óskarsson, háseti, Ingólfsstræti 21, Reykjavik. Fæddur 22. febrúar 1918. Ókvæntur.

Tímaritið Ægir. September 1941.

08.11.2016 13:05

104. Hrafnkell NK 100. TFXR.

Hrafnkell NK 100 var smíðaður í Spillersboda í Svíþjóð árið 1946. Eik. 91 brl. 260 ha. Polar díesel vél. Eigandi var Ríkissjóður Íslands frá 9 desember 1946. Skipið var selt 19 mars árið 1949, Hrafnkeli h/f í Neskaupstað. Ný vél (1958) 450 ha. Lister díesel vél. Skipið var endurmælt 1963, mældist þá 102 brl. Selt 29 ágúst 1963, Hauki Guðmundssyni og Hafsteini Sigurjónssyni á Seyðisfirði, hét Skálaberg NS 2. Skipið var endurmælt í febrúar 1968, mældist þá 90 brl. Skipið var selt árið 1968, Eldeyju h/f í Keflavík. Selt 5 febrúar 1971, Helga Bergvinssyni, Leu Sigurðardóttur og Viktori B Helgasyni í Vestmannaeyjum, hét Stígandi VE 77. Ný vél (1976) 620 ha. Gummins vél. Selt 31 desember 1976, Hallgrími Garðarssyni í Vestmannaeyjum, hét Sæþór Árni VE 34. Talið ónýtt og tekið af skrá 12 október 1981. Skipinu var svo sökkt í Halldórsgjá, norðvestur af Stóra Erni við Vestmannaeyjar.


Hrafnkell NK 100.                                                                                       Ljósmyndari óþekktur.


Reknetasíld söltuð um borð í Hrafnkeli NK á Húnaflóa árið 1956.                     Ljósmyndari óþekktur.

             VETRARVERTÍÐIN 1960
                    Neskaupstaður

Óvenjumargir bátar koma í skýrsluna fyrir Neskaupstað að þessu sinni, sem stafar af því, að fleiri bátar en áður lögðu meiri hluta afla síns þar á land; flestir þeirra, einkum handfærabátar, lögðu einnig töluvert fiskmagn á land annars staðar. Eins og lesendum Ægis mun vera kunnugt, eru bátarnir ávallt taldir til þeirrar verstöðvar, sem þeir leggja meirihluta afla síns á land, og þá að sjáfsögðu einnig með þann hluta aflans, sem landað er annars staðar. Af þessum sökum er venjulega einhver munur á því aflamagni, sem berst á land í ákveðinni verstöð og því sem birtist í bátaskýrslunum. Að þessu sinni lönduðu 17 bátar auk opinna báta afla sínum í Neskaupstað samtals 1.919 lestum; afli opinna báta o. fl. var 170 lestir. Landanir voru alls 653, en flestir bátarnir voru að meira eða minna leyti í útilegu. Aflahæsti báturinn var Hrafnkell NK 100 með 482 lestir í 27 löndunum. Báturinn stundaði veiðar, bæði með línu og netjum. Skipstjóri er Þórlindur Magnússon.

Ægir. 13 tbl. 15 júlí 1960.

07.11.2016 09:08

B. v. Norðlendingur ÓF 4. TFLE.

Norðlendingur ÓF 4 var smíðaður hjá John Lewis & Sons Ltd í Aberdeen í Skotlandi árið 1948. Smíðanúmer 207. 660 brl. 1.000 ha. 3 þennslu gufuvél. Hét fyrst Bjarnarey VE 11 og var í eigu Bæjarútgerðar Vestmannaeyja og kom til heimahafnar í fyrsta sinn 14 mars 1948. 7 febrúar árið 1953 fór fram nafnbreyting á skipinu, hét þá Vilborg Herjólfsdóttir VE 11. Skipið var selt 26 mars 1955, Norðlendingi h/f sem var sameignarfélag þriggja sveitarfélaga, þ.e. Ólafsfjarðar, Sauðárkróks og Húsavíkur. Skipið hét Norðlendingur ÓF 4. Selt 12 september 1962, Útgerðarfélagi Akureyringa h/f á Akureyri, hét Hrímbakur EA 5. Skipið var selt til niðurrifs og tekið af skrá 2 febrúar árið 1970.


Norðlendingur ÓF 4 við bryggju á Sauðárkróki.                        (C) Héraðsskjalasafn Skagfirðinga.


Norðlendingur ÓF 4 við Torfunefsbryggju á Akureyri.                           (C) Minjasafnið á Akureyri.


Norðlendingur ÓF 4 við Torfunefsbryggjuna á Akureyri.                          (C) Minjasafnið á Akureyri.


Hrímbakur EA 5. Orðið stutt í endalokin.                                                      Ljósmyndari óþekktur.


Bjarnarey VE 11.                                                                                         (C) George Wisemann.


   Bjarnarey, nýr togari til Vestmannaeyja

Vestmannaeyingar hafa nú fengið annan nýsköpunartogara, Bjarnarey. Kom skipið til Eyja aðfaranótt sunnudags s.l. Klukkan 10 f. h. fór fram móttökuhátíð og hjeldu ræður við það tækifæri Ólafur Kristjánsson bæjarstjóri, Einar Sigurðsson og Páll Þorbjörnsson. Lúðraflokkur Ijek og söngflokkur söng við það tækifæri. Um kvöldið var svo alment hóf í samkomuhúsinu. Bjarnarey er af sömu gerð og fyrri togari Vestmannaeyinga, Elliðaey, bygður í Aberdeen. Skipstjóri er Guðvarður Vilmundsson. Eigandi skipsins er Bæjarútgerð Vestmannaeyja.

Morgunblaðið. 17 mars 1948.



06.11.2016 11:54

87. Hafborg MB 76. TFQM.

Hafborg MB 76 var smíðuð hjá Skipasmíðastöð KEA á Akureyri árið 1944 fyrir Hlutafélagið Grím í Borgarnesi. Eik. 92 brl. 240 ha. Lister díesel vél. Skipið var endurmælt árið 1947, mældist þá 101 brl. Selt 16 desember 1952, Rún h/f í Bolungarvík, hét Heiðrún ÍS 4. Ný vél (1956) 360 ha. Lister díesel vél. Selt 18 júní 1968, Jóni Magnússyni á Patreksfirði og Hjalta Gíslasyni í Reykjavík, skipið hét Vestri BA 3. Selt 5 febrúar 1972, Árna Sigurðssyni og Reyni Ölverssyni í Keflavík, skipið hét Sólfell GK 62. Talið ónýtt og tekið af skrá 18 desember árið 1973.


Hafborg MB 76 við bryggju á Siglufirði.                                                  (C) Sigurgeir B Halldórsson.


Hafborg MB 76 á síldveiðum.                                                        (C) Sigurgeir B Halldórsson.


                      Hafborg MB 76

Þann 5. maí síðastliðinn var lokið við smíði á nýju skipi í Skipasmíðastöð KEA á Akureyri. Skip þetta heitir Hafborg og hefur einkennisstafina M. B. 76. Yfirumsjón með smíði þess hafði Gunnar Jónsson skipasmiður. Hafborg er 92 rúml. brúttó og hefur 320 hestafla Lister-Dieselvél, en auk þess hefur það 8 hestafla hjálparvél sömu tegundar. Olíugeymar rúma um 10 smálestir. Fullhlaðið ber skip þetta, auk fullra olíugeyma, 73 smál. af fiski og 17,5 smál af ís. Eigandi Hafborgar er h/f Grímur í Borgarnesi. Skipstjóri á henni er Kristján Pétursson, er lengi hefur verið stýrimaður á v /s Eldborg, sem er eign sama félags.

Ægir. 1 ágúst 1944.

05.11.2016 09:32

1031. Magnús NK 72. TFEP.

Magnús NK 72 var smíðaður hjá Lindstöl Skips & Baatbyggeri A/S í Risör í Noregi árið 1967 fyrir Ölver h/f í Neskaupstað. Smíðanúmer 263. 274 brl. 755 ha. Ruston díesel vél. Kom fyrst til heimahafnar sinnar, Neskaupstaðar 19 mars sama ár. Skipið var endurmælt í september 1970 og mældist þá 222 brl. Yfirbyggt árið 1977, mældist þá 252 brl. Ný vél (1981) 1.066 ha. Bergen díesel vél, 784 Kw. Skipið var selt 11 mars 1988, Þorbirni h/f í Grindavík, hét Hrafn Sveinbjarnarson lll GK 11. Selt 11 október 1988, Siglubergi h/f í Grindavík, hét Valaberg GK 399. Selt 16 febrúar 1989, Bergi h/f í Vestmannaeyjum, hét Bergur VE 44. Árið 1997 var skipið lengt og því breytt, mælist þá 484 brl. Skipið var lengt árið 2000, mældist þá 574 brl. Ný vél (2000) 5.032 ha. Caterpillar díesel vél, 3.700 Kw. Árið 2005 var nafni skipsins breytt, hét þá Álsey VE 2. Árið 2007 var nafni skipsins breytt, hét þá Álsey ll VE 24. Selt sama ár, Ísfélagi Vestmannaeyja h/f, hét Carpe Diem HF 32. Árið 2009 er skipið skráð í eigu Hosma h/f í Hafnarfirði. Selt árið 2011, Bp Skip Afríka ehf í Reykjavík, hét Alpha HF 32. Árið 2014 er skipið í eigu Hákarls ehf í Hafnarfirði. Skipið var selt úr landi í mars árið 2015.

Magnús NK 72 með fyrsta loðnufarminn í hina nýju Loðnuverksmiðju SVN í Neskaupstað 12 febrúar árið 1976.                                                                             (C) Guðmundur Sveinsson.

Magnús NK 72 á landleið með fullfermi.                                                    Ljósmyndari óþekktur. 


Magnús NK 72 í Leirvík á Hjaltlandseyjum.                            (C) J.A. Hugson. Shetland Museum.


Magnús NK 72. Búið að byggja yfir skipið.                                           (C) Gunnar Þorsteinsson.


Alpha HF 32 við bryggju á Akureyri.                                      (C) Haukur Sigtryggur Valdimarsson.

                 Magnús NK 72

Hið nýja skip Ölvers Guðmundssonar, Magnús NK 72, kom hingað 19. marz. Hafði skipið hreppt versta veður á heimsiglingunni og reyndist vel. Skipið var smíðað í Risör í Noregi og er 274 tonn að stærð. Áðalvélin er 750 ha. Lister. Hjálparvélar eru 2, báðar Lister, önnur 60 og hin 20 ha. Er önnur þeirra undir hvalbak. Ganghraði var tæpar 12 mílur í reynsluför. Í skipinu eru 16 rúm í 10 klefum og eru íbúðir allar aftur í skipinu. Skipstjóri á Magnúsi er Jón Ölversson, stýrimaður Hjörtur Árnason, 1. vélstjóri Jón Stefánsson og 2. vélstjóri Sigurður Guðnason. Magnús er þegar farinn á þorskveiðar með nót.

Austurland. 31 mars 1967.

           Loðna fryst í Neskaupstað

Magnús NK varð fyrst skipa til þess að koma með loðnu til Neskaupstaðar eftir að nýja bræðslan hóf móttöku. 78 tonn af aflanum voru tekin til frystingar. Einnig voru tekin 50 tonn úr Sveini Sveinbjörnssyni til frystingar. Fram að þessu hefur loðnan ekki verið frystingarhæf, en nú má búast við að skriður komist á frystinguna. 10 þús. tonn af frystri loðnu hafa verið seld til Japan af framleiðslu þessa árs.

Austurland. 13 febrúar 1976.

04.11.2016 10:57

Hringur SI 1. LBWM. / TFKE.

Hringur SI 1 var smíðaður í Kaupmannahöfn árið 1875. Járn og stál. 88 brl. 250 ha. 2 þennslu gufuvél. Skipið var flutt inn árið 1923, hét þá Rolf. Fékk nafnið Siglunes SI 15 og var í eigu Henriks Henriksens á Siglufirði frá 7 júní það ár. Selt 3 febrúar 1930, Fáfni h/f í Reykjavík, hét Fáfnir RE 3. Selt 20 júní 1934, Bergþóri Teitssyni í Reykjavík. Selt 26 nóvember 1937, Jóni Ásgeirssyni á Siglufirði, skipið hét Hringur SI 1. Skipið var lengt árið 1942, mældist þá 93 brl. Ný vél (1942) 190 ha. Gummins díesel vél. Selt 2 janúar 1946, Guðmundi Jörundssyni á Akureyri, skipið hét Njörður EA 767. Ný vél (1947) 200 ha. Ruston díesel vél. Selt 1 mars 1947, Pálmari G Guðnasyni á Akureyri, Steingrími Sigurðssyni á Hjalteyri og Jóni G Sólnes á Akureyri. 5 júlí 1949 var skráður eigandi Sólnes h/f á Akureyri. Selt árið 1957, Húnasíld h/f á Höfðakaupstað. 25 júlí sama ár var Fiskveiðasjóður skráður eigandi. Selt 29 janúar 1958, Vísundi h/f í Reykjavík, skipið hét Vísundur RE 280. Talið ónýtt og tekið af skrá árið 1963.

Hringur SI 1 við bryggju á Siglufirði. Sennilega er það togarinn Þórólfur RE 134 sem sést í aftan við Hring. Ljósmyndari óþekktur.

Hringur SI 1 eftir lenginguna árið 1942.                    Ljósmyndari óþekktur, mynd úr Íslensk skip.










03.11.2016 08:39

224. Viktoría RE 135. TFMP.

Viktoría RE 135 var smíðuð í Halsö í Svíþjóð árið 1946. Eik. 102 brl. 260 ha. Polar díesel vél. Eigandi var Viktoría h/f í Reykjavík frá 30 nóvember 1946. Ný vél (1960) 465 ha. Lister díesel vél. 12 október árið 1962 er skipið skráð í Þorlákshöfn, sami eigandi en skipið hét Þorlákur ÁR 5. Skipið var endurmælt í febrúar 1966, mældist þá 85 brl. Selt 31 desember 1970, Auðbjörgu h/f í Þorlákshöfn, hét Fengur ÁR 55. Selt 26 mars 1973, Gunnari Jónassyni í Ólafsvík og Guðmundi Jónassyni, Lýsuhóli, Staðarsveit í Snæfellssýslu, hét Fengur SH 18. Skipið sökk 16 maí 1975, var að koma frá Reykjavík til Ólafsvíkur er skyndilega kom mikill leki að skipinu. Vélskipið Jón Jónsson SH 187 frá Ólafsvík var með feng í togi er hann sökk. Áhöfn Fengs, 9 mönnum, var bjargað um borð í Jón Jónsson SH.


Viktoría RE 135.                                                                                   (C) Sigurgeir B Halldórsson.


Þorlákur ÁR 5.                                                                                            Mynd úr Íslensk skip.

02.11.2016 10:13

Arthur & Fanny. LBWV / TFNG.

Kútter Arthur & Fanny var smíðaður hjá Smith, Stevenson & Vere í Grimsby á Englandi árið 1883 fyrir William Grant í Cleethorpes í Grimsby, hét þá Arthur & Fanny GY 880. Eik og fura. 46 brl. Eigandi var Leonhard Tang á Ísafirði frá 23 febrúar 1899. Tang gerði skipið út á hákarlaveiðar um tíma og mun það vera eitt af síðustu skipunum sem þær veiðar stunduðu hér við land. Var svo gert út til þorskveiða. Skipstjóri var lengst af Þorbergur Steinsson frá Dýrafirði. 7 maí árið 1907 voru skráðir eigendur Leonhard Tang & Sön á Ísafirði, fær þá skráningarnúmerið ÍS 29. Vél var sett í skipið 1923, 84 ha Tuxham vél. Skipið var selt 22 júlí 1926, h/f Djúpbátsfjelaginu á Ísafirði, hét Arthur & Fanny RE 259. 10 janúar 1929 var skráningarnúmeri skipsins breitt í ÍS 499. 10 mars 1936 var skráður eigandi útibú Útvegsbankans á Ísafirði. Ný vél (1939) 110 ha. June Munktell vél. Selt 3 ágúst 1940, Kristjáni Tryggvasyni á Akureyri, hét Arthur & Fanny EA 658. Selt 6 júní 1941, Óskari Halldórssyni Kothúsum, Garði í Gullbringusýslu, hét Arthur GK 374. Selt 14 mars 1945, Milly h/f á Siglufirði, hét Milly SI 81. Selt 3 júní 1958, Gunnari Halldórssyni h/f á Raufarhöfn og Leifi Zakaríassyni í Reykjavík, hét Milly RE 39. Talið ónýtt og tekið af skrá 18 ágúst 1964.


Arthur & Fanny.                                                                                      Ljósmyndari óþekktur.


Arthur & Fanny á siglingu með farþega.                                                     Ljósmyndari óþekktur.


Milly RE 39.                                                                                              (C) Snorri Snorrason.

       Djúpbáturinn Arthur & Fanny

Á meðal þeirra skipa sem notuð voru til áætlunarferða á Ísafjarðardjúpi á 3 og 4 áratugnum, var gamla hákarlaskipið Arthur & Fanny sem gekk fyrir steinolíuvél. Einn forráðamanna Djúpbátsfélagsins lýsir þessum bát svo árið 1930, að hann sé bæði úreltur og óhentugur, enda hafi hann aðeins eitt farrými, lúkar, sem rúmi aðeins 15 farþega. Þetta eina farþegarúm er hið sama og , sem áhöfninni er ætlað, með þeim afleiðingum, að áhöfnin komist mjög sjaldan í koju, því hún verði yfirleitt að láta sjúklingum og sjóveiku fólki rúm sín eftir. Þetta sé þeim mun verra sem nú sé oftar siglt bæði á nóttu og degi. Þá var báturinn eyðslufrekur og ekki bara á steinolíu heldur líka á vatn.

Heimild: Póstsaga Íslands 1873-1935. 

01.11.2016 11:59

B. v. Júní GK 345. TFPD.

Júní GK 345 var smíðaður hjá Cochrane & Sons Ltd í Selby á Englandi árið 1920 fyrir útgerðarfélagið Hauk h/f í Reykjavík. Smíðanúmer 736. 327 brl. 600 ha. 3 þennslu gufuvél. Hét Ingólfur Arnarson RE 1. Skipið var selt árið 1922, A/S Tjaldi í Vogi á Suðurey í Færeyjum, hét Royndin TG 634. Skipið var selt 9 desember árið 1930, Boston Deep Sea Fishing & Ice Co Ltd í Fleetwood. Skipið var skráð í Grimsby 8 maí 1931 sem Daily Telegraph GY 367. Skipið var selt í september 1933, Soc. Anon des Pécheries Saint Pierre í Boulogne í Frakklandi, hét þar La Vierge aux Roses B 1624. Skipið var selt Fred Parks í Blackpool í Englandi í ársbyrjun 1934. Selt í mars 1934, Bæjarútgerð Hafnarfjarðar h/f í Hafnarfirði, fær nafnið Júní GK 345. Togarinn strandaði við Sauðanes í Önundarfirði, 1 desember árið 1948. 25 mönnum var bjargað um borð í togarann Ingólf Arnarson RE 201, en 2 mönnum var bjargað á land af björgunarsveit frá Suðureyri. Togarinn eyðilagðist á strandstað.

Júní GK 345.                                                              Ljósmyndari óþekktur, mynd í minni eigu. 


Áhöfnin á Júní GK 345.                                                                Ljósm: Guðbjartur Ásgeirsson.


Ingólfur Arnarson RE 1.                                                                               Ljósmyndari óþekktur.


Royndin TG 634.                                                                                                www.wagaskip.dk


Daily Telegraph GY 367.                                           (C) The Mark Stopper Collection.

Togarinn Júní GK strandar við Sauðanes

Öll áhöfnin af togaranum Júní frá Hafnarfirði, sem strandaði skammt sunnan við Sauðanes, milli Önundarfjarðar og Súgandafjarðar í fyrrakvöld, bjargaðist heil á húfi, og er nú komin til Flateyrar. Tókst björgunarbáti frá Ingólfi Arnansyni að selflytja 23 menn úr Júní, en einn þeirra tók út af flekanum, og bjargaði mótorbáturinn Garðar honum. Voru þá aðeins tveir menn eftir í hinu strandaða skipi, skipstjórinn, Júlíus Sigurðsson, og fyrsti stýrimaður, Guðmundur Þorleifsson. Tókst björgunarsveit frá Suðureyri að bjarga þeim úr landi. Júní strandaði í norðaustan ofsaveðri og hríð, sem enn hélzt yfir Vestfjörðum í gærkvöldi, þá með 10-11 vindstigum. Tókst Ingólfi Arnarsyni að finna skipið með radartækjum sínum í fyrrinótt, og björgunin fór fram í gærmorgun. Þykir hún hin vasklegasta, og lögðu björgunarmenn sig í mikla hættu. Júní strandaði á sjöunda tímanum í fyrrakvöld við Sauðanes milli Önundarfjarðar og  Súgandafjarðar. Heyrðu nokkrir togarar neyðarkall hans og fóru þegar á vettvang. Var kafaldshríð og norðaustanofsarok, er Ingólfur Arnarson, Júlí úr Hafnarfirði og Skúli Magnússon hófu leitina að Júní. Björgun virtist illmöguleg þá, og var kallað á mótorbáta til aðstoðar. Komu Garðar og Hardy á vettvang seint um kvöldið, en þá var ákveðið að reyna ekki björgun fyrr en með birtu. Hafði Slysavarnafélagið þá beðið björgunarsveit frá Suðureyri að fara á  vettvang, og kom hún á strandstaðinn i gærmorgun eftir erfiða ferð. Um níuleytið í gærmorgun virtist Júní um 100 metra frá landi, og er stórgrýtt nokkuð á þessu svæði. Var brim allmikið og sást ekkert nema hvalbakurinn á skipiriu. Mun sennilega hafa komið gat á skipið og sjór gengið inn í vélarrúmið. Áhöfnin hafði búið um sig á hvalbaknum og beið björgunar. Skyggni var enn slæmt í morgun og veður ofsi mikill. Björgunin fór fram með þeim hætti, að settur var á flot bátur frá Ingólfi, og fór hann eins langt í áttina að Júní og unnt var, en lína var höfð á milli bátsins og Ingólfs. Úr þessum björgunarbáti var svo skotið línu um borð í Júní og tókst síðan að selflytja 23 menn úr Júní yfir í björgunarbátinn á  fleka. Einn mann tók þó út af flekanum, en mótorbáturinn Garðar bjargaði honum. Björgunarstarf þetta var mjög hættulegt, og lögðu sjómennirnir af Ingólfi sig í allmikla hættu. Þegar þeir höfðu bjargað 24 mönnum voru tveir menn eftir í skipinu. Reyndi nú björgunarsveitin frá Súgandafirði að bjarga þeim, og tókst það rétt um hádegið í gær, svo að skipshöfnin af hinu strandaða skipi var þá öll heil á húfi. Togarinn Júní er 28 ára gamalt skip, sem var upphaflega smíðað fyrir íslendinga. Héðan var það selt til Færeyja, þaðan til Englands og Þaðan var það keypt aftur hingað til lands, er Bæjarútgerð Hafnarfjarðar eignaðist það. í gærkvöldi barst Árgeir Stefánssyni, framkvæmdastjóra Bæj arútgerðarinnar, skeyti frá skipstjóranum, sent frá Flateyri, þar sem hann segir, að skipshöfninni líði nú vel, en hún er í landi þar í þorpinu. Togararnir Júlí og Ingólfur Arnarson voru, þegar síðast fréttist til, einnig á Flateyri.

Alþýðublaðið 3 desember 1948.

Flettingar í dag: 188
Gestir í dag: 48
Flettingar í gær: 988
Gestir í gær: 153
Samtals flettingar: 1540252
Samtals gestir: 415876
Tölur uppfærðar: 21.9.2019 04:31:41