13.07.2017 06:53

Einar þveræingur EA 537.

Einar þveræingur EA 537 var smíðaður af Steinþóri Baldvinssyni á Akureyri árið 1930. Eik og fura. 12 brl. 20 ha. Union vél. Eigendur voru Magnús Gamalíelsson og Guðbjartur Snæbjörnsson á Ólafsfirði frá 2 desember 1930. Ný vél (1939) 40 ha. Union vél. Báturinn var lengdur árið 1943 og mældist þá 18 brl. Báturinn brann og sökk út af Hraunhafnartanga 24 júlí árið 1947. Áhöfnin bjargaðist í nótabátinn og þaðan um borð í Gaut EA 669.


Einar þveræingur EA 537.                                                                     (C) Gunnar Óli Björnsson.


Einar þveræingur EA 537. Líkan Gríms Karlssonar skipstjóra.                     (C) Þórhallur S Gjöveraa.

        "Einar Þveræingur"brennur

Skipverjar á m.b. Einar Þveræingur, urðu að yfirgefa skipið er eldur kom upp í því seinnipart dags í gær. Einar Þveræingur (eldra skipið), var á siglingu út af Melrakkasljettu, er eldur kom upp í því. Breiddist hann óðfluga út og gátu skipverjar ekki við hann ráðið. Varð skipið alelda á tiltölulega skammri stundu og urðu skipverjar að yfirgefa skipið í nótabát sínum. Enginn þeirra mun hafa slasast, en giskað er á að áhöfnin hafi verið 8 til 10 menn. Frjett þessi barst til Morgunblaðsins skömmu áður en blaðið fór í pressuna og er því ekki kunnugt um hvað af skipverjum varð.

Morgunblaðið. 25 júlí 1947.

Útblástursrör kveikti í "Einari þveræing"

Nánari frjettir hafa nú borist af því, er mb. Einar Þveræingur brann og sökk út af Melrakkasljettu í fyrrakvöld. Báturinn sökk um kl. 1 í fyrrinótt um það bil 4 til 5 sjómílur út af Hraunhafnartanga. Einar Þveræingur var annar um nót við m.b. Gaut. Eldsupptök eru talin stafa frá útblástursröri vjelarinnar.

Morgunblaðið. 26 júlí 1947.

12.07.2017 06:26

815. Sveinn Guðmundsson AK 70. TFOR.

Sveinn Guðmundsson AK 70 var smíðaður í Frederikssund í Danmörku árið 1947 fyrir Harald Böðvarsson & Co h/f á Akranesi. Eik. 67 brl. 225 ha. June Munktell vél. Ný vél (1958) 390 ha. MWM díesel vél. Seldur 11 nóvember 1963, Haukaveri h/f í Reykjavík, hét Haukur RE 64. Seldur 12 maí 1972, Haukaveri h/f á Djúpavogi, báturinn hét Haukur SU 50. Endurmældur 1974, mældist þá 71 brl. Báturinn sökk suður af Stokksnesi 25 nóvember 1975. Áhöfnin, 4 menn, bjargaðist í gúmmíbjörgunarbát. Var mönnunum síðan bjargað um borð í togarann Skinney SF 20 frá Höfn í Hornafirði.


Sveinn Guðmundsson AK 70 á siglingu.                                                             (C) Ólafur Árnason.


Haukur RE 64 í Reykjavíkurhöfn.                                  Ljósmyndari óþekktur, mynd úr Íslensk skip.


Haukur RE 64.                                                                                            (C) Sigurður Bergþórsson.


Sveinn Guðmundsson AK 70 í hópi fríðra Akranesbáta.                           (C) Þórhallur S Gjöveraa.

   Nýr 70 smálesta bátur til Akraness

Í fyrradag kom nýr bátur til Akraness byggður í Friðrikssund. Bátur þessi sem er eign Haraldar Böðvarssonar & Co,, heitir ,Sveinn Guðmundsson" og er 65-70 smálestir. Í bátnum er 225 hestafla June-Munktel-vél. Hingað heim sigldi bátnum Elías Benediktsson, en skipstjóri á honum verður Þórður Sigurðsson. Báturinn fer strax norður á síld. Akranessbátarnir eru nú að verða tilbúnir á síldveiðar og fóru þrír norður í fyrradag, og aðrir eru alveg á förum. Alls munu 10-12 bátar frá Akranesi verða gerðir út , á síldveiðar, auk Ólafs Bjarnasonar og Sindra.

Alþýðublaðið. 5 júlí 1947.


Bjargaði 4 mönnum eftir að bátur                              þeirra sökk

Vélbáturinn Haukur SU 50 frá Djúpavogi sökk 22 sjómílur SA af Stokksnesi um kl. 20.30 í gærkvöldi. Fjórir menn voru á bátnum og komust þeir um borð í gúmbjögunarbát og var bjargað um borð í skuttogarann Skinney frá Hornafirði litlu síðar. Var Skinney væntanleg til Hafnar í Hornafirði um miðnæturleytið með skipbrotsmennina. "Björgun mannanna tókst ágætlega, þeir voru búnir að vera í gúmmíbátnum í um það bil hálfa klukkustund, þegar við komum að þeim," sagði Þorleifur Dagbjartsson, skipstjóri á Skinney er Mbl. hafði samband við hann í gærkvöldi. "Þeir voru fjórir í öðrum bátnum en hinn höfðu þeir bundið samsíða.
Þegar við áttum eftir 8 mílur í Hauk sáum við hann á ratsjánni, en stuttu síðar hvarf hann. Leið svo nokkur stund, en þá sáum við hvar flugeldum var skotið á loft frá gúmmíbátnum, og eftir það gekk allt vel." Hannes Hafstein framkvæmdastjóri Slysavarnafélags Íslands sagði að Tilkynningaskyldunni hefði borizt orðsending frá loftskeytastöðinni á Höfn um að leki væri kominn að Hauki og var það um kl. 19.15 og var síðan haft samband við skip úti af Stokksnesi. Brátt kom í ljós, að Skinney SF 20 var nærstödd og sagðist skipstjóri togarans sjá bátinn í átta sjómílna fjarlægð. Fylgdust skipverjar á Skinney með Hauki í ratsjánni þar til hann sökk, síðast heyrðist frá bátnum kl. 19.30.

Morgunblaðið. 26 nóvember 1975.

11.07.2017 06:39

569. Hjalti SI 12.

Hjalti SI 12 var smíðaður af Antoni Jónssyni skipasmið á Akureyri árið 1916. 9 brl. 10 ha. Hein vél. Hét fyrst Hjalti EA 360. Eigandi var Einar Einarsson á Akureyri frá sama ári. Seldur 2 desember 1930, Anton Jónssyni á Siglufirði, báturinn hét Hjalti SI 15. Seldur 7 september 1931, Þorbirni Áskelssyni á Grenivík, hét Hjalti TH 272. Ný vél (1933) 35 ha. June Munktell vél. Báturinn var lengdur árið 1936, mældist þá 11 brl. Ný vél (1939) 50 ha. June Munktell vél. Seldur 19 sept 1948, Hlutafélaginu Hjalta á Siglufirði, báturinn hét Hjalti SI 12. Ný vél (1957) 66 ha. Kelvin díesel vél. Hjalti var talinn ónýtur og tekinn af skrá 18 janúar árið 1979.


Hjalti SI 12 við bryggju á Siglufirði.                                                     (C) Þór Eyfeld Magnússon.


Hjalti SI 12.                                                                                             (C) Már Jóhannsson.


Hjalti SI 12 á siglingu.                                                                          (C) Þjóðbjörn Hannesson.


Hjalti SI 12. Líkan Gríms Karlssonar.                                                (C) Þórhallur S Gjöveraa.

        Borgarísjaki út af Siglufirði

             Mikil og tignarleg sjón  

Fréttaritari blaðsins á Siglufirði, Steingrímur Kristinsson fór á m.b. Hjalta út að borgarísjaka, sem var 7-8 sjómílur frá landi, og tók með fylgjandi myndir af honum. Það var mikil og tignarleg sjón að sjá þetta ferlíki gnæfa 20-40 metra hátt yfir sjávarmál og 100-150 m. á breidd, þar sem jakinn er breiðastur, segir Steingrímur. Og þó er þetta sennilega aðeins 1/9 hlutinn af jakanum, hitt mun vera neðansjávar. Hann segir svo frá ferðinni: - S. l. laugardag sá ég fyrsta borgarísjakann á minni 30 ára ævi, en þá var jakinn eins og smádepill úti við sjóndeildarhringinn. Á mánudag var sami jaki staddur út af Siglufirði, ásamt öðrum minni 1-2 sjómílur utar. Hafði sá stóri á sunnudag verið á hraðri ferð austur með landinu, þrátt fyrir austan kalda og sjó, en á mánudag var farið að hvessa meira og jakinn snúinn við og hélt í vestur undan veðrinu, ásamt minni jakanum. Sást vel til jakans bæði á sunnudag og mánudag frá Siglufjarðarkaupstað. Bar hann yfir Siglunesið eins og stór snjóhvít eyja, glæsileg að sjá. Utan af ströndinni sást hann betur og var mikil umferð um veginn úteftir. Bílar fóru með fólk með sjónauka, sem vildi virða þessa tignarlegu og sjaldgæfu sjón fyrir sér.


Borgarísjakinn út af Siglufirði.                                                         (C) Steingrímur Kristinsson.

Og nú fór ljósmyndari okkar af stað. Hann leigði sér mótorbátinn Hjalta SI 12. Með hann eru svokallaðir Kambsbræður, Grímur og Gunnar Helgasynir, sem fyrr hafa dugað okkur vel, lentu t.d. í sögulegu ferðalagi á sínum tima í hvassviðri við að koma til okkar myndum af tunnuverksmiðjubrunanum. Steingrímur ljósmyndari tók sem sagt sjóveikitöflu og lagði í hann. En 7-8 vindstig voru, talsverður sjór og þar á ofan kröpp vindbára, og rak veðrið alla undir þiljur áður en 20 mínútur voru liðnar og ekki var liðin klukkustund, þegar Ægi var fórnað gómsætum signum fiski ásamt nýjum kartöflum. Eftir hálfs annars tíma siglingu í bansettum hamagangi, höggum og veltingi, miður þægilegum fyrir höfuð, maga og hnjáliði, sló vélstjórinn á Hjalta, Gunnar Helgason, af og andæfði, segir Steingrímur. Mikið var um smáísrek, jakar höfðu brotnað úr borgarísnum og þurfti að vara sig á þeim. Ekki var hægt að "stíga á land", bæði vegna sjógangs og brattra hliða jakans. Taldi Grímur Helgason, skipstjóri ekki ráðlegt að fara mjög nærri, því ekki er gott að átta sig á hvort brotið í kring um jakann stafar af sogi, sem myndast af grynningum, t.d. ef sá hluti jakans sem er neðansjávar, skagar mikið út undan. En árangur ferðarinnar sést á meðfylgjandi myndum, sem Steingrímur tók af jakanum.

Morgunblaðið. 17 september 1964.

10.07.2017 11:51

333. Bjarni Ólafsson GK 200. TFXM.

Bjarni Ólafsson GK 200 var smíðaður í Skipasmíðastöð Marselíusar Bernharðssonar á Ísafirði árið 1944 fyrir Albert Bjarnason útgerðarmann í Keflavík. Eik. 35 brl. 120 ha. Wichmann vél. Frá árinu 1950 er báturinn skráður KE 50, sami eigandi. Ný vél (1950) 240 ha. GM vél. Seldur 12 júlí 1955, Halldóri Jónssyni í Ólafsvík, báturinn hét Bjarni Ólafsson SH 177. Seldur 31 maí 1963, Guðna Sturlaugssyni á Selfossi og Sigurjóni Sigurðssyni á Stokkseyri, hét Bjarni Ólafsson ÁR 9. Árið 1966 er Guðni Sturlaugsson einn skráður eigandi bátsins. Ný vél (1971) 240 ha. GM díesel vél. Seldur 6 ágúst 1973, Guðmundi Ragnarssyni í Reykjavík, hét Bjarni Ólafsson RE 97. Seldur 27 maí 1974, Páli Grétari Lárussyni á Hvammstanga, báturinn hét Fróði HU 10. Fróði brann við bryggju á Hvammstanga 11 desember árið 1975 og var talinn ónýtur eftir brunann.


Bjarna Ólafssyni GK 200 hleypt af stokkunum hjá Marselíusi í nóvember 1944.    Mynd úr safni mínu.


Bjarni Ólafsson KE 50. ex GK 200.                                                   (C) Þórhallur S Gjöveraa.

      Bátur brennur á Hvammstanga

Um kl. 7 árdegis í gærmorgun urðu skipverjar á Glað HU 67 varir við að reyk lagði upp úr mb. Fróða HU 10, þar sem hann lá við bryggju á Hvammstanga. Við nánari eftirgrennslan kom í ljós að eldur var laus í vélarrúmi bátsins og var slökkvilið staðarins kallað út. Endanlega hafði tekizt að ráða niðurlögum eldsins, sem einungis var neðan þilja, á tólfta tímanum en við slökkvistarfið var beitt froðu og vatni. Báturinn er verulega skemmdur og óvíst hvort hann fer aftur á veiðar. Eldurinn var einungis í vélarrúmi bátsins og brann vélarrúmið að innan en eldsupptök eru ókunn. Einn maður svaf frammi í bátnum, þegar eldurinn kom upp, en hann sakaði ekki. Fjórir bátar hafa að undanförnu stundað rækjuveiðar frá Hvammstanga og var Fróði einn þeirra. Rækjuveiði hefur gengið fremur illa og hjálpast þar að ógæftir og lélegri veiði heldur en verið hefur undanfarin ár.

Morgunblaðið. 12 desember 1975.

09.07.2017 20:41

1274. Páll Pálsson ÍS 102 í slippnum í Reykjavík.

Páll Pálsson ÍS 102 hefur verið seldur Vinnslustöðinni hf í Vestmannaeyjum og var gengið frá sölunni í enduðum síðasta mánaðar. Verið er að mála skipið í lit Vinnslustöðvarinnar hjá Slippfélaginu í Reykjavík. Nýja nafn skipsins mun vera Kap lll VE 41. Ég tók þessar myndir af honum í slippnum í dag, glæsilegt skip. Japanstogararnir voru falleg skip, mjög vel byggð og reyndust öll vel. Nú eru einungis eftir þrír togarar af tíu. Auk Páls, eru Múlaberg SI 22 og Ljósafell SU 70 eftir af þessum fríða flota Japanstogaranna.

1274. Páll Pálsson ÍS 102, verðandi Kap lll VE 41.                   


1274. Páll Pálsson ÍS 102. 

1274. Páll Pálsson ÍS 102.

1274. Páll Pálsson ÍS 102.

1274. Páll Pálsson ÍS 102.

1274. Páll Pálsson ÍS 102.

1274. Páll Pálsson ÍS 102. Skrúfublöðin eru svolítið illa farin, vel sorfin í endana.

1274. Páll Pálsson ÍS 102. Búið að taka stýrið af. Sennilega verður skipið öxuldregið.
                                                      (C) Myndir: Þórhallur S Gjöveraa. 9 júlí 2017.


1274. Páll Pálsson ÍS 102. Upphaflegt útlit, nema búið er að hækka lunningar aftur fyrir skorsteinshús.

 Farsæl 44 ár hjá Páli Pálssyni ÍS 102

Skuttogarinn Páll Pálsson ÍS 102 landaði í morgun í síðasta sinn afla til vinnslu hjá Hraðfrystihúsinu - Gunnvöru hf. í Hnífsdal, en eins og kunnugt er hefur skipið verið selt til Vinnslustöðvarinnar hf. í Vestmannaeyjum.  Í nær fjörutíu og fimm ár hefur Páll verið gerður út frá Hnífsdal og verið burðarás í landvinnslu fyrirtækisins.  Í haust tekur síðan nýr Páll Pálsson ÍS 102, við keflinu en unnið er að lokafrágangi hans í Kína.
Páll var einn af fyrstu skuttogurum Íslendinga þegar hann kom nýr til landsins í febrúar 1973 frá Japan þar sem hann var smíðaður.  Ýmsar nýjungar fylgdu komu skuttogaranna, t.d. gjörbreyttist öll aðstaða fyrir áhöfn og byrjað var að ísa aflann í plastkassa um borð. Síðar komu fiskkerin og öflugri og betri kæling til sögunnar en skipið fór í endurbætur og lengingu árið 1988 í Póllandi.  Aflasæld hefur fylgt skipinu alla tíð og hefur það borið að landi um 220 þúsund tonn af fiski sé miðað óslægðan afla uppúr sjó.  Aflaverðmætið þessi fjörutíu og fimm ár á núverandi verðlagi er um 45 milljarðar króna.   
Slíkum árangri er ekki hægt að ná nema með góðu skipi og vel mannaðri áhöfn. Mannabreytingar hafa verið mjög litlar í áranna rás, sem sést best á að meðalstarfsaldur áhafnarinnar er yfir 20 ár. Meðal þeirra sem nú eru í áhöfn hefur Guðmundur Sigurvinsson vélstjóri verið lengst eða í 36 ár samfleytt á Páli en hann hefur ákveðið að nú sé komið gott og fer í land.  Aðeins þrír skipstjórar hafa verið á skipinu, Guðjón Arnar Kristjánsson sótti Pál til Japans og var skipstjóri í 19 ár, Kristján Jóakimsson var skipstjóri í 4 ár,  en lengst hefur Páll Halldórsson verið skipstjóri en hann hefur verið við stjórnvölinn síðastliðin 22 ár. Nú styttist í að Páll haldi til Kína til þess að sækja nýjan og glæsilegan Pál Pálsson.
Við þessi tímamót vilja stjórnendur Hraðfrystihússins-Gunnvarar hf,  þakka núverandi og fyrrverandi skipverjum Páls Pálssonar samstarfið og óska þeim velfarnaðar.

Vefsíða H.G. í Hnífsdal. 21. júní 2017                                                       

09.07.2017 09:12

B. v. Tryggvi gamli RE 2. LCHR / TFQC.

Tryggvi gamli RE 2 var smíðaður hjá Cochrane & Sons Ltd í Selby á Englandi árið 1920 fyrir Útgerðarfélagið Hauk í Reykjavík. 326 brl. 600 ha. 3 þennslu gufuvél. Smíðanúmer 737. Hét fyrst Þorsteinn Ingólfsson RE 2. Selt árið 1922, h/f Alliance í Reykjavík, fékk nafnið Tryggvi gamli RE 2. Togarinn var seldur í brotajárn til Danmerkur og rifinn í Óðinsvé árið 1955.


B.v. Tryggvi gamli RE 2 að koma til löndunar í Djúpavík.                     (C) Guðbjartur Ásgeirsson.


Tryggvi gamli RE 2 á Reykjarfirði á Ströndum.                                  (C) Guðbjartur Ásgeirsson.


Tryggvi gamli RE 2 að veiðum, sennilega í Jökuldýpi.                         (C) Guðbjartur Ásgeirsson.


Alliancetogarinn Tryggvi gamli RE 2 á siglingu.                                  (C) Guðbjartur Ásgeirsson.


Tryggvi gamli RE 2. Þetta líkan er á Slippbarnum í Reykjavík.   (C) Þórhallur S Gjöveraa. 9 júlí 2017.

               Nýr botnvörpungur

Enn bætst við fiskiflotann. Það er Þorsteinn Ingólfsson, eign hlutafélagsins Hauks. Hann kom hingað í gær frá Englandi og voru þessir farþegar: Thor Jensen, Kjartan Thors, Friðþjófur Thorsteinsson og Gottfredsen útgerðarmaður. Skipið er af sömu gerð eins og Ingólfur Arnarson. Skipstjóri er Einar Einarsson, frá Flekkudal.

Vísir. 1 júlí 1920.

      Fiskiveiðahlutafjelagið "Alliance"

Elsta og stærsta togaraútgerðarfélag á Íslandi

Fiskiveiðahlutafjelagið "Alliance" var stofnað árið 1906. Voru stofnendur þess: Thor Jensen kaupmaður, og skipstjórarnir, Jón Ólafsson, Jón Sigurðsson, Halldór Kr. Þorsteinsson, Magnús Magnússon, Kolbeinn Þorsteinsson og Jafet Ólafsson. Fjórir þessara skipstjóra höfðu áður gert með sjer fjelag og keypt kúttera árið 1904, en þilskipaútgerð stóð þá hjer í mestum blóma. Í páskaveðrinu 7. apríl 1906 fórst Jafet Ólafsson, ásamt mörgum öðrum, en árið 1910 seldi Thor Jensen hlut sinn og gekk úr fjelaginu. Þegar h/f. "Alliance" var stofnað, höfðu Íslendingar litla þekkingu á togaraútgerð og enga reynslu á því sviði.
Að vísu höfðu verið keyptir tveir togarar hingað til lands frá Englandi, en þeir voru báðir gamlir og mjög ófullkomnir, enda varð árangurinn eftir því. Í febrúar 1907 kom fyrsta skip fjelagsins, "Jón forseti", hingað til lands, og stýrði honum Halldór Kr. Þorsteinsson skipstjóri, sem þá hafði dvalið á annað ár í Englandi til þess að kynna sjer botnvörpuveiðar. "Jón forseti" var smíðaður í Glasgow svo fullkominn, sem þá var frekast kostur. Var hann fyrsti togari, er Íslendingar ljetu smíða, og má því segja, að með komu hans hefjist togaraútgerð Íslendinga. Það kom strax í ljós, að togaraútgerð gæti, ef skynsamlega væri að farið, orðið arðvænlegur atvinnuvegur fyrir landsmenn, enda fóru menn þá óðum að feta í fótspor þessara manna og hefir togurum síðan fjölgað ár frá ári, uns íslendingar eiga nú 40 togara. Fjelagið hefir eignast 6 togara, en af þeim misst tvo, þá Skúla fógeta, byggðan 1911, fórst hann í Norðursjónum í byrjun ófriðarins, 26. ágúst 1914, og Jón forseta, sem strandaði á Stafnestöngum 27. febrúar 1928; á það því nú 4 togara. Auk þess eiga stofnendur "Alliance", þeir sem enn eru í fjelaginu, 4 aðra togara að nokkru eða öllu leyti, og hafa þannig umráð yfir 1/5 hluta af togaraútgerð landsmanna. Fjelagið hefir komið sjer upp fullkomnum fiskþurrkunarstöðvum með tilheyrandi húsakynnum og getur það nú breitt til þurrkunar í einu ca. 600,000 kg. fiskjar. Auk þess hefir fjelagið byggt fiskþurrkunarhús, sem afgreiðir að meðaltali 10,000 kg. af fullþurrum fiski á sólarhring. Árið 1929 voru útfluttar afurðir h/f. "Alliance" og þeirra fjelaga, sem það hefir umsjón með, sem hjer segir:
Verkaður saltfiskur 3180 þúsund kg.
Óverkaður saltfiskur 2080 þús. kg.
Ísfiskur kr. 675.000.
Lýsi kr. 358.800.
Sama ár flutti fjelagið inn 14,000 smálestir af kolum og 7,000 smálestir af salti. Mestan hluta veiðarfæra lætur fjelagið vinna á vinnustofu sinni við Tryggvagötu, og er unnið að netagerð o. fl. allt árið. Hjá fjelaginu voru sama ár unnin:
Á skipunum 50.000 dagsverk.
Við fiskverkun 27.600 dagsverk.
Netagerð 1.460 dagsverk.
Uppskipun. 7.880 dagsverk.
Önnur störf 7.070 dagsverk, og hafa þannig verið unnin 314 dagsverk að meðaltali hvern virkan dag ársins. Stjórn fjelagsins hafa þeir alla tíð skipað: Jón Ólafsson, Halldór Kr. Þorsteinsson, Magnús Magnússon, Jón Sigurðsson, og Jón Ólafsson, sem jafnan hefir verið framkvæmdastjóri þess.

Morgunblaðið. 26 júní 1930.

07.07.2017 21:59

Barðsneshorn.

Flestir ef ekki allir sæfarendur þekkja Barðsneshorn sem leið eiga til hafnar í Neskaupstað. Barðsneshorn eða Horn er oftast kallað Norðfjarðarhorn á meðal sjómanna og flestir þekkja það undir því nafni. Ég fór ásamt skipsfélaga mínum á Barða NK, Skúla Aðalsteinssyni fyrir rúmlega 20 árum, í land í Rauðubjörgum sem eru innan við Hornið að vestan verðu og blasa þau við frá bökkunum í Neskaupstað. Gengum við félagarnir sem leið lá út á Barðsneshornið, eins langt og hægt var að fara. Þetta var engin glæfraferð, en vissara að fara varlega því snarbratt er að austanverðu og nánast hengiflug niður í sjó. Mónesið skagar fram í sjó um 3-4 mílum sunnar að austan verðu og er það eina undirlendið sem má kalla á þeim slóðum. Ferðalag okkar félaganna tók daginn, en því miður var engin myndavélin með í för. En nóg er til af myndum af Horninu og Rauðubjörgum og læt ég þær fylgja hér með.

Barðsneshorn. Til vinstri sér í Gerpi, austasta tanga landsins.                         (C) Björn Björnsson.

Barðsneshorn og Norðfjarðarflói. Tók þessa mynd um borð í togaranum Barða NK árið 1994.

Rauðubjörg vestan á Barðsnesi.                                                     (C) Jónína Harpa Njálsdóttir. 

                   Barðsneshorn

Barðsneshorn, stundum kallað Horn, er yzta táin á Barðsnesi, sem er útvörður Norðfjarðarflóa að austan. Hornið er mjög sæbratt og fjallið þar inn af er úr ríólíti en ofan á því eru þykk brotabergs og gjóskulög. Líkt og annars staðar á Austfjörðum hallar berglögunum þar bratt til vesturs og líkur benda til, að þarna séu leifar af stórri eldstöð, sem sjórinn hefur veðrað að mestu.
Ríólítið kemur skírt fram í hinum litríku Rauðubjörgum, vestast á nesinu. Þarna finnast baggalútar, sem eru líka kallaðir hreðjasteinar, grænn biksteinn og niðri við sjó eru uppréttir, kolaðir trjástofnar, allt að einum metra í þvermál. Sumir telja þessa stofna elztu gróðurleifar landsins (15 millj. ára). Á nesinu voru fyrrum fimm bæir, þegar flest var, og útsýni er frábært á góðum degi.

www.nat.is


04.07.2017 20:16

794. Stígandi ÓF 25. TFMS.

Stígandi ÓF 25 var smíðaður í Rödvig í Danmörku árið 1947. Eik. 76 brl. 260 ha. Alpha díesel vél. Eigendur voru Sigurður Baldvinsson, Jón Guðjónsson og Anton Benjamínsson á Ólafsfirði frá 30 júní 1948. Ný vél (1962) 280 ha. Alpha díesel vél. Skipið var endurmælt 1962, mældist þá 81 brl. Selt 4 nóvember 1965, Steingrími Magnússyni í Reykjavík, hét Magnús lV RE 18. Selt 27 júní 1968, Sjólastöðinni h/f í Reykjavík, hét Sjóli RE 18. Selt 7 júlí 1977, Hjörleifi Hallgrímssyni á Akureyri, skipið hét Helgi magri EA 277. Selt 1979, Sjólastöðinni í Hafnarfirði, hét Sjóli RE 18. Skipið var talið ónýtt og tekið af skrá og sökkt í Faxaflóa 5 júlí árið 1981.


Stígandi ÓF 25.                                                                               (C) Hafsteinn Jóhannsson.

       "Stíganda" bjargað frá strandi

Vélskipið Stígandi frá Ólafsfirði varð fyrir því óhappi í gær, að vél þess bilaði og munaði minnstu, að skipið ræki stjórnlaust upp á sker. Þetta gerðist skammt norður af Skagatá, en þar mun Stígandi hafa verið að veiðum. Vindur var nokkur af norðri eða norðaustri og rak bátinn í áttina að landi. Var einkum talin hætta á að hann bæri upp á svonefnt Skallarif.
Skipverjum tókst að stýra skipinu fram hjá því, á síðustu stundu, með seglaútbúnaði skipsins. Slysavarnafélagið bað nærstödd skip að fara Stíganda til aðstoðar og um kl. 1 var vélskipið Stjarnan frá Akureyri komin Stíganda til hjálpar. Mun hann þá hafa verið kominn mjög nærri landi. Að öðru leyti hefir allt verið tíðindalaust af sjónum nú undanfarna daga, enda bezta veður flesta þeirra.

Lögberg. 18 maí 1950.

03.07.2017 12:30

938. Öðlingur ÁR 10. TFSP.

Öðlingur ÁR 10 var smíðaður í Marstrand í Svíþjóð árið 1946. Eik. 51 brl. 170 ha. Polar díesel vél. Hét fyrst Græðir ÓF 3 og var gerður út af Græði h/f á Ólafsfirði. Ný vél (1952) 350 ha. Grenaa díesel vél. 28 janúar 1958 var nafni bátsins breytt, hét þá Hannes Andrésson ÓF 3. Seldur 28 mars 1959, Græði h/f á Bíldudal, hét Jörundur Bjarnason BA 65. Ný vél (1959) 225 ha. MWM díesel vél. Seldur 10 október 1962, Vigfúsi Jónssyni og Sverri Bjarnfinnssyni á Eyrarbakka, báturinn hét Öðlingur ÁR 10. 1 febrúar 1965 kveiknaði í bátnum þar sem hann stóð í slippnum á Eyrarbakka tilbúinn til að setja hann niður. Hann var síðan dreginn til Njarðvíkur, en var svo mikið skemmdur eftir brunann að hann var talinn ónýtur og tekinn af skrá 6 maí árið 1965.


Öðlingur ÁR 10.                                                                                        Ljósmyndari óþekktur. 

Jörundur Bjarnason BA 65.                                                                       Mynd úr Íslensk skip.                                                                           

02.07.2017 20:30

373. Ásbjörn MB 90. TFZL.

Ásbjörn MB 90 var smíðaður í Skipasmíðastöð Marselíusar Bernharðssonar á Ísafirði árið 1943. Eik. 52 brl. 120 ha. Lister díesel vél. Eigendur voru Sameignarfélagið Ásbjörn á Akranesi frá 28 september 1943. Árið 1947 var báturinn skráður Ásbjörn AK 90. Ný vél (1951) 198 ha. Mirrlees díesel vél. Seldur 26 apríl 1953, Haraldi Böðvarssyni & Co h/f á Akranesi, sama nafn og númer. Ný vél (1960) 300 ha. MWM díesel vél. Seldur 19 september 1963, Guðna Sigurðssyni í Reykjavík og Sigurbirni Árnasyni í Garðahreppi, báturinn hét Dreki RE 134. Seldur 15 mars 1972, Þórveigu h/f í Grindavík, hét Þórveig GK 222. Ný vél (1974) 350 ha. Caterpillar díesel vél. 4 mars 1975 er Skipasmíðastöð Njarðvíkur eigandi bátsins. Seldur 12 mars 1975, Jakob Jónatanssyni í Þorlákshöfn, hét Trausti ÁR 71. Talinn ónýtur og tekinn af skrá 11 desember árið 1979.


Ásbjörn MB 90 nýsmíðaður hjá Marselíusi Bernharðssyni árið 1943.                 Mynd úr safni mínu.


Ásbjörn AK 90. Líkan Gríms Karlssonar.                                                (C) Þórhallur S Gjöveraa.


Ásbjörn AK 90 í hópi nokkura Akranesbáta í Sjóminjasafninu Víkinni.         (C) Þórhallur S Gjöveraa.

02.07.2017 07:03

B. v. Njörður RE 36. LCDK.

Botnvörpungurinn Njörður RE 36 var smíðaður hjá Cochrane & Sons Ltd í Selby á Englandi árið 1912 fyrir J. Marr & Sons Ltd í Fleetwood á Englandi, hét fyrst Velia FD 229. 278 brl. 500 ha. 3 þennslu gufuvél, smíðuð hjá C.D.Holmes & Co Ltd í Hull. 133,6 x 24 x 13 ensk ft. Smíðanúmer 536. Skipið var sjósett 31 ágúst sama ár. Selt 28 janúar 1914, Togarafélaginu Nirði í Reykjavík (Elías Stefánsson), fékk nafnið Njörður RE 36. Togaranum var sökkt 18 október 1918 af þýska kafbátnum U-122, um 25 sjómílur suðvestur af St. Kilda við Skotlandsstrendur þegar hann var á leið í söluferð til Fleetwood. Áhöfnin, 12 menn, bjargaðist  í björgunarbát og þaðan um borð í breska togarann Lord Lister H 484 frá Hull eftir tæplega 3 sólarhringa hrakninga. Fór togarinn með skipbrotsmennina til Londonderry á Norður Írlandi.

 
Njörður RE 36. Danski fáninn málaður á síður skipsins, enda fyrra stríð í fullum gangi.     (C) G. Á. 
 

                         Njörður

 Nýtt botnvörpuskip komið til Reykjavíkur
 
Hinum Íslenzka botnvörpuskipastól bættist í gær óvanalega gott skip. Hlutafélagið »Njörður«, sem stofnað var hér í bænum fyrir nokkru, eins og vér gátum um í blaði voru, tók á móti hinu fyrsta skipi sínu í gær. Skipstjóri á skipinu, sá sem farið hefir til Bretlands til þess að kaupa og stjórna skipinu hingað, sigldi þvi á tæpum 4 sólarhringum frá Fleetwood á Englandi og hingað. En sá staður liggur á vesturströnd Englands. Njörður, svo kallast skipið, kom hingað í fyrrakvöld seint. En í gær hafði framkvæmdastjóri félagsins, hr. Elías Stefánsson, boðið á skipsfjöl ýmsum heldri borgurum þessa bæjar. Voru í þeirra tölu margir af meðeigendum skipsins, hluthöfum í félaginu Njörður. Var farið í vélbát frá Duusbryggju kl. 1 síðdegis. Í förinni voru meðal annara, Geir kaupmaður Zoéga, Th. Thorsteinsson kaupmaður, Sighvatur Bjarnason bankastjóri, Kristján Jónsson háyfirdómari, O. Forberg símastjóri, Magnús Einarsson dýralæknir, sr. Jóhann Þorsteinsson, Páll Halldórsson skólastjóri, Elías Stefánsson framkvæmdarstjóri, Ellert Schram skipstjóri, Vilhjálmur Finsen ritstjóri, Árni Olason blaðamaður o. fl, Gestunum var undir eins boðið niður í káetuna.
 
Njörður RE 36 við bryggju (í miðið), sennilega á Akureyri. Hinir togararnir eru Víðir GK 450 til h. Og vinstramegin við Njörð er Jón forseti RE 108. Flutningaskip lengst til vinstri.      (C) G. Á.

Guðmundur Guðnason skipstjóri tók á móti þeim á þilfarinu og var nú sezt að drykkju. Sighvatur Bjarnason bankastjóri hóf þá glas sitt og tók til máls. Sagðist ekki ætla að skíra barnið, en vilja þakka, bæði fyrir sig og aðra þá er hér væru, fyrir þá ánægju, sem þeim væri veitt með því að vera boðnir hér á skipsfjöl í fyrsta skipti er skipið varpaði akkerum hér við land. Sagði það ósk sína og allra, að fyrirtæki þessu mætti jafnan fylgja hin mesta gæfa og yrði enginn galli á gjöf Njarðar, að í skut félagsins féllu þau höpp, sem óskir frekast næðu að vona. Var þá full félagsins drukkið af heilum huga, í freyðandi kampavíni, og fylgdi því óblandin árnaðarósk allra gestanna. Síra Jóhann Þorsteinsson stóð þá upp og þakkaði fyrir hönd félagsins öllum þeim er gerst höfðu gestir þess á þessum degi, og þó einkum bankastjórn Íslandsbanka, sem hefði látið sér mjög ant um vöxt félags þessa, þegar í öndverðu, og hjálpað því með ráðum og dáð, og stuðlað mjög að því, að svo væri nú komið að skip þetta lægi nú á Reykjavíkurhöfn í stað þess að sigla undir ensku flaggi í Fleetwood á vesturströnd Bretlands. Hann kvað þegar gerða bráðabirgðaskírn á drengnum og þyrfti hér því ekki langra ummæla. Höfundur nafnsins væri Pálmi kennari Pálsson og sá maður, sem hefði haldið barninu undir skemmri skírn, væri skipstjóri þess, Guðmundur Guðnason. Væri honum margt þakkandi vegna ötulleiks hans og góðra tilþrifa í þágu félagsstjórnar. Sagðist ræðumaður því vilja styðja það, að nafn þetta festist við botnvörpunginn, og taka í sama streng og bankastjóri Sighvatur Bjarnason hefði svo heppilega að orði komist, að enginn galli yrði hér á gjöf Njarðar. Var nú aftur drukkin skál félagsins og skipstjórans.
 
Njörður RE 36 í Reykjavíkurhöfn, sennilega árið 1914. Örfiriseyjargarðurinn í byggingu.       Póstkort.

Th. Thorsteinsson kaupmaður tók þá til máls og þakkaði fyrir góðar viðtökur. Sagði það von sína, að fyrirtæki þessu mundi gæfa fylgja og árnaði því allra heilla. Ræðumaður bað því næst alla viðstadda drekka minni útgerðarstjórans, hr. Elíasar Stefánssonar. Var það og gert af fúsum vilja. Því næst stakk Elias upp á því, að skipið sigldi út fyrir eyjar til þess að gestirnir gætu séð með eigin augum, hve hratt skipið sigldi og fundið hve vel það klyfi sjóinn. Þótti öllum sú uppástunga góð og var þá létt akkerum og haldið til hafs. Knörrinu klauf öldurnar alla leið upp undir Kjalarnes. Stormur var á móti og glettist Ægir lítið eitt við skipið gestum til skemmtunar. Skipið er, að dómi allra þeirra er það skoðuðu, hið traustasta og bezta. Í því eru þrjár lestir fyrir fisk og er þó skipið mun rúmbetra en margur mundi við búast, enda 130 fet á lengd og breidd 23 fet. Vélasalurinn er einkar rúmgóður. Hefir vélin 60 hesta afl og skríður skipið nær 11 mílum á vöku hverri. Í hásetaklefa eru rúm fyrir átta menn, en 24-26 menn er ætlast til að á skipinu verði, er það gengur til fiskjar. En tíu voru þeir, er skipið sóttu til Englands og voru þeir tæpa fjóra sólarhringa frá Fleetwood á Englandi hingað til lands. Má það kalla góða ferð og töfðust þeir þó lítið eitt á leiðinni. Skipstjóri skipsins er hr. Guðmundur Guðnason. Er það fyrsti botnvörpungurinn er Guðmundur stjórnar, en kunnur sjómaður hér við flóann er hann mjög. Hefir hann í mörg ár verið skipstjóri á þilskipum og þótt fiskimaður hinn bezti. Guðmundur býður af sér hinn bezta þokka, er ötull og áreiðanlegur maður og sjómaður hinn bezti. 
 
Njörður RE 36.                                                                                         Teikning eftir H. Á 1918.

Allir skipverjar, er vér áttum tal við, lofuðu skipstjóra mjög fyrir dugnað, og spáum vér því, að skipi þessu verði vel stjórnað af honum. Stýrimaður skipsins er hr. Jón Guðmundsson og hefir hann starfað á botnvörpuskipum í síðastliðin 4 ár. Er hann ungur og röskur maður, en þó eigi nema rúmlega tvítugur. Vélameistari er hr. Ólafur Jónsson, dugnaðarmaður hinn mesti. "Njörður" er 16. botnvörpuskipið, sem fiskveiðar á að stunda héðan úr Faxaflóa. Þótti kunnugum það vera hið vandaðasta skip í alla staði og tiltölulega ódýrt til reksturs. Eyðir það t. d. aðeins um 7 smálestum af kolum á sólarhring, en það þykir mjög lítið. Ókunnugum virðist í fljótu bragði botnvörpufyrirtæki eigi stór. En í þessu sambandi viljum vér bæta þvi við, að útgerð skips, eins og "Njörður", kostar árlega nær 1/4 milljón krónur eða því sem næst. Vér óskum bæði félaginu og skipstjóranum allra heilla á komandi árum. 

Morgunblaðið. 9 febrúar 1914.

Breski togarinn Lord Lister H 484 bjargaði áhöfninni af Nirði eftir hrakningana.            Úr safni mínu.
 

              "Njörður" kafskotinn

Sú fregn barst hingað í gærmorgun að botnvörpungnum Nirði hafi verið sökkt af þýzkum kafbáti, er hann var á leið til Fleetwood, hlaðinn fiski í ís. Skipverjar allir komust af og náðu landi í Londonderry á Írlandi. Skipinu var sökkt á föstudaginn. »Njörður« hefir farið margar ferðir með fisk til Englands á þessu ári, en ætíð verið svo heppinn að komast hjá kafbátunum. Er mjög bagalegt fyrir Njarðarfélagið að hafa misst skipið, sem var hið vandaðasta í alla staði, en beint tjón mun félagið tæplega bíða mikið, því skipið var vel vátryggt.

Morgunblaðið. 24 október 1918.
 

            Þegar "Nirði" var sökkt.

                  Frásögn skipverja

Botnvörpungurinn "Ýmir" kom til Hafnarfjarðar í gærmorgun úr Englandsför. Með honum komu 3 skipverjar af botnvörpungnum "Nirði", sem sökkt var. Náði Morgonblaðið tali af einum þeirra í gor og sagði hann svo frá ferðalaginu:
Við fórum héðan á þriðjudaginn 15. október. Á föstudagsmorgun, um kl. 10, sáum við kafbát. Vorum við þá um 25 sjómílur suðvestur af St.. Kilda. Um kl. 11 skaut kafbáturinn fyrsta skotinu á skipið. Hæfði það þó eigi, en við fórum þegar að týgja okkur til þess að yfirgefa skipið. En áður en við legðum frá borði hafði kafbáturinn skotið 9 skotum en ekkert þeirra kom á skipið. Fyrsta skotið, sem hæfði, kom á aftursigluna og braut hana af. Skaut kafbáturinn nú svo að segja látlaust á skipið þangað til það sökk, en þá mun klukkan hafa verið hálf þrjú. Eftir það hvarf kafbáturinn og höfðum við ekki tal af honum. Veður var hvast á ANA og hvesti þó enn meira um nóttina. Í bátunum höfðum við nógan mat og drykk, en allan farangur sinn misstu menn og póstur fórst þar með skipinu. Við gerðum nú ýmist að sigla eða róa og batnaði veðrið eftir því sem á leið. Klukkan 11 á mánudagsmorgun bjargaði okkur brezkur botnvörpungur, vopnaður. Vorum við þá um 25-30 mílur vestur af Írlandi.
Botnvörpungurinn flutti okkur til Londonderry á Írlandi og komum við þangað á laugardagsmorgun. Þaðan fórum við með járnbrautarlest til Belfast og þaðan til Fleetwood. Þangað komum við á þriðjudag, eða viku eftir að við lögðum á stað að heiman. Botnvörpungurinn "Ýmir" lagði á stað frá Fleetwood á laugardaginn og með honum fóru 3 okkar, 2 koma með "Snorra Goða" og 1 með "Jóni Forseta". Skipstjóri, stýrimenn, fyrsti vélstjóri og tveir hásetar urðu að verða eftir í Englandi vegna sjóprófa. Höfðu þeir farið tvær ferðir til Liverpool, þar sem sjóprófin voru haldin, og bjuggust við því að þurfa að fara þangað eina ferð enn. Er ekki að vita hvenær þeir muni koma heim. Enginn skipverja hlaut nein meiðsl og engum þeirra varð neitt meint af sjóvolkinu í bátunum. Nokkurt tjón hafa þeir allir beðið í missi fata og annara muna, en gleðilegt að æfintýrið hafði ekki verri afleiðingar.

Morgunblaðið. 1 nóvember 1918.

01.07.2017 06:51

828. Vébjörn ÍS 14. LBCH / TFDJ.

Vébjörn ÍS 14 var smíðaður í Risör í Noregi árið 1928. Eik og fura. 44 brl. 90 ha. Ellwe vél. Eigendur voru Halldór Sigurðsson, Eiríkur Einarsson, Jakob Gíslason á Ísafirði og Haraldur Guðmundsson, Seyðisfirði frá desember 1928. Vébjörn kom til heimahafnar á Ísafirði að morgni nýársdags árið 1929. Frá 3 nóvember 1943 var Samvinnufélag Ísfirðinga eigandi bátsins. Ný vél (1943) 165 ha. Gray díesel vél. Seldur 23 janúar 1956, Hraðfrystihúsi Grundarfjarðar h/f, hét Sæfari SH 104. Ný vél (1956) 225 ha. Mannheim díesel vél. Talinn ónýtur og tekinn af skrá 6 september árið 1967. Báturinn var síðan brenndur stuttu síðar.


Vébjörn ÍS 14 við bryggju á Ísafirði.                                                                       (C) M. Simson.


Vébjörn ÍS 14. Báturinn er talsvert ísaður þarna við bryggjuna.                                 (C) M Simson.


Vébjörn ÍS 14 að koma til löndunar með fullfermi síldar.                              (C) Leó Jóhannsson.

          Samvinnufélag Ísfirðinga

   Aflinn á fjórum mánuðum tvöfalt meira

       virði en ábyrgð ríkissjóðs nemur

Eitt hið þarflegasta, er alþingi í fyrra , samþykti, var að veita ríkisstjórninni heimild til þess a<5 jganga í ábyrgð fyrir lánum til fé- lagsmanna í Samvinnufélagi ísfirðinga tíl kaupa á fiskiskipum. >ð
ganga í ábyrgð fyrir lánum til félagsmanna í Samvinnufélagi Ísfirðinga til kaupa á fiskiskipum.
Þess þarf tæplega að geta, að íhaldið stóð sem einn maður gegn þessu þarfa máli og lét ekki linna á hrakspám og rógsögum um þetta þjóðþrifafyrirtæki. Með þessu var gróðursettur fyrsti vísir til samvinnufélagsskapar um útgerð hér á landi og sjómenn og verkamenn vestra styrktir til þess að koma á fót atvinnufyrirtækjum í stað þeirra, sem fallið höfðu í rústir undir stjórn stórútgerðarmannanna. Um áramótin síðustu fengu félagsmenn 5 ný mótorskip um 45 smálestir með 90 hestafla vélum, Eru skipin öll af sömu gerð og vélarnar líka. Kostuðu skipin fullbúin, komin til Ísafjarðar um 57 þús. þús. krónur hvert. Af því gekk ríkissjóður í ábyrgð fyrir 45 þús kr. fyrir hvert skip, eða 225 þús. krónum alls. Skipin byrjuðu veiðar seint í janúarmánuði, og var afli þeirra á hvítasunnu, eða í tæpa 4 mánuði, orðinn sem hér segir':
Ísbjörn um 539 þús. pd.
Sæbjörn - 501 - -
Ásbjörn - 482 - -
Vébjörn - 464 - -
Valbjörn - 459 - -
Samtals um 2445 þús. pd.
eða um 1220 smálestir upp úr skipi. Mun það svara til nærri 5.000 skippunda af verkuðum fiski. Verðmæti aflans í þessa 4 mánuði nemur sennilega um hálfri milljón króna, miðað við að mestur hluti aflans verði seldur fullverkaður og verð lækki ekki mikið frá því, sem nú er. Á hverju skipi hafa verið 12 til 14 menn, eða um 65 alls, og voru hlutir þeirra til páska, eða í u. þ. b. 10 vikur, 1800-2200 krónur. Aflanum frá páskum til hvítasunnu er enn óskift, nemur hann um 2/5 hlutum aflans alls. Eru þá enn ótalin öll vinnulaun við verkun fisksins og annað þar að lútandi. Skifta þau mörgum tugum þúsunda króna. Beinar tekjur ríkissjóðs af atvinnurekstri félagsins þessa 4 mánuði nema 10-20 þús. krónum. Eru það útflutningsgjöld af fiski, lýsi o. fl, og innflutningstollur af salti, veiðarfærum, olíu o. fl. Auk þess auknir skattar af tekjum fólksins, sem við fyrirtækið vinnur á landi og sjó. Fyrir ábyrgð sína, 225 þús. kr., hefir þjóðin þaninig í þessa 4 mánuði fengið hálfrar milljónar viðbótartekjur og 10-20 þús. krónur bent í ríkissjóðinn. Og það sem mest er um vert: Vísir að nýju og heilbrigðu skipulagi í atvinnumálum er gróðursettur. Vísir, sem áreiðanlega á eftir að vaxa og þroskast.

Vikuútgáfa Alþýðublaðsins. 29 maí 1929.

29.06.2017 21:45

2 m. Kt. Egill RE 17. LBSQ.

Kútter Egill RE 17 var smíðaður í Brixham á Englandi árið 1871. 69 brl. Árið 1917 var sett í skipið 48 ha. Alpha vél. Hét áður Marquis of Lorne. Kútterinn var keyptur hingað til lands árið 1897 og fyrsti eigandi virðist hafa verið Klemens Egilsson Minni Vogum á Vatnsleysyströnd frá því ári. Selt 3 febrúar árið 1900, Jóhannesi Jósepssyni í Reykjavík. Kútterinn var gerður upp í slippnum í Reykjavík árið 1904. Selt 10 júní 1905, Þorsteini Þorsteinssyni og Birni Símonarsyni í Reykjavík. 15 janúar 1907 var Þorsteinn einn eigandi skipsins. Selt 3 nóvember 1909, Hlutafélaginu Stapanum í Reykjavík. Skipið var selt 15 júlí 1910, O. Ellingsen í Reykjavík. Sama ár selt H.P. Duus í Reykjavík, skipið hét Iho RE 17. Iho strandaði við Gjögur í Reykjarfirði á Ströndum 20 október árið 1930. Áhöfnin bjargaðist en skipið eyðilagðist á strandstað.

Kútter Egill RE 17 í slippnum í Reykjavík.                             (C) Magnús Ólafsson.

Kútter Egill RE 17 á Reykjavíkurhöfn.                                                      (C) Magnús Ólafsson. 


Kútter Egill RE 17 lengst til vinstri í slippnum í Reykjavík. Árið mun vera 1904, því það ár var slippurinn stækkaður. Skipið í miðjunni er gufubáturinn Reykjavík sem annaðist póst og farþegaflutnnga á Faxaflóa fyrir og eftir aldamótin 1900. Hann var fyrsta skipið sem tekið var upp í slippinn endurbyggðan. Reykjavíkin endaði upp í fjörunni við Batteríið í febrúar árið 1907 og eyðilagðist.                                                                   (C) Magnús Ólafsson.

 Kútter Iho RE 17 strandar við Gjögur

Síðasti Faxaflóakútterinn strandaði við Gjögur við Reykjarfjörð á Ströndum, mánudaginn 20. Október 1930 í stórviðri af norðri. Skip þetta kom hingað til lands 1897, keypt í Englandi og hét þá Marquess of Lorne. Vogamenn keyptu skipið og nefndu það »EgiI«, og héldu því úti skamma stund, síðan keypti trésmiður Jóhannes Jósefsson það og hélt því úti á veiðum, en hann hætti brátt útgerð og eftir það áttu ýmsir skipið þar til H. P. Duus verzlun eignaðist það 15. júlí 1910. Var Ólafur Ólafsen forstöðumaður verzlunarinnar, kom hann hingað á sumrin, en var búsettur í Kaupmannahöfn. Hann breytti nafni skipsins og nefndi það »Iho«; er nafnið samsett af upphafsstöfum nafna sona hans, Ingvars, Hálfdáns og Ólafs. Hefir skipið borið það heiti síðan. Einhverjar leifar munu eftir af kútterflota landsins, en skipin munu flest úr sér gengin, enda flest smíðuð á tímabilinu 1880 til 1886 og má það heita góð ending. Nokkrir hinna íslenzku kúttara, eru í eign Færeyinga og eru á veiðum vertíð hverja, en á þeim er farið að sjá sem von er, en allir voru þeir gæðaskip.

Ægir. 10 tbl. október 1930.

27.06.2017 20:15

Freyja ÍS 364. LBFH.

Freyja ÍS 364 var smíðuð í Gautaborg í Svíþjóð árið 1913. Eik. 29 brl. 70 ha. Populer vél. Eigendur voru Jóhann Þorsteinsson, Stefán Bjarnason og Ásgeir Jónsson á Ísafirði (frá 1913 ?) Ný vél (1924) 70 ha. Finnö vél. Báturinn var seldur 12 nóvember 1930, Friðbert Guðmundssyni og Gísla Guðmundssyni á Suðureyri, sama nafn og númer. Ný vél (1934) 90 ha. June Munktell vél. Ný vél (1946) 90 ha. June Munktell vél. Seldur 22 október 1953, Fiskiðjunni Freyju h/f á Suðureyri, sama nafn og númer. Ný vél (1953) 240 ha. GM díesel vél. Freyju rak á land í Súgandafirði 15 janúar árið 1957 og eyðilagðist. 
Í sjómannaalmanaki frá 1928 er skipið sagt 34 brl, smíðað í Marsdal í Noregi árið 1907. Ekki veit ég hvort er réttara, nema að þarna sé um annað skip að ræða.


Freyja ÍS 364.                                                                            (C) Guðbjartur Ásgeirsson.

25.06.2017 17:34

2890. Akurey AK 10. TFJH.

Akurey AK 10 var smíðuð hjá Celiktrans Shipyard í Istanbúl í Tyrklandi árið 2017 fyrir H.B. Granda h/f í Reykjavík. 1.827 bt. 2.445 ha. MAN B&W 6L27/38, 1.799 Kw. Smíðanúmer CS 49. Skipið er hannað af Nautic, Skipahönnun & Ráðgjöf í Reykjavík. Akurey kom til heimahafnar á Akranesi að morgni 21 júní s.l. eftir rúmlega 12 sólarhringa siglingu frá Tyrklandi og reyndist skipið í alla staði mjög vel á heimferðinni. Móttökuathöfn var haldin á Akranesi á föstudaginn var, og var skipinu þá formlega gefið nafn. Þá var bæjarbúum, gestum og gangandi, boðið að skoða skipið og við það tækifæri boðið að þiggja veitingar í boði útgerðarinnar. Svo mun Skaginn 3 X koma fyrir vinnslubúnaði á millidekk og setja sjálfvirkt lestarkerfi í skipið. Mun sú vinna taka nokkra mánuði. Ég tók þessar myndir af Akurey upp á Skaga í blíðunni í dag. Sannarlega glæsilegt skip.

2890. Akurey AK 10 TFJH við bryggju á Akranesi.

2890. Akurey AK 10.

        Ný Ak­ur­ey kom­in í heima­höfn

           Þetta er alveg magnað skip

Akurey AK kom í fyrsta sinn til heimahafnar á Akranesi að morgni sl. þriðjudags eftir 12,5 sólarhringa siglingu frá Tyrklandi, þar sem skipið var smíðað. Akurey var vel á undan áætlun því gert hafi verið ráð fyrir því að heimsiglingin tæki allt að því 14 daga.
,,Það skotgekk hjá okkur á heimsiglingunni og þetta er alveg magnað skip. Eftir að við komum út á Atlantshaf fengum við mest norðaustan átt á okkur en einnig stífa vestanátt, 18-20 metra á sekúndu og allt að þriggja metra ölduhæð, en skipið haggaðist ekki. Við sigldum svo beint upp í ölduna til þess að reyna á sjóhæfnina. Það var sama sagan. Skipið haggaðist ekki frekar en í hliðarvindinum," segir Eiríkur Jónsson skipstjóri.
Að sögn Eiríks verður skipinu gefið formlega nafn í Akraneshöfn á morgun en að lokinni móttökuathöfn verður skipið til sýnis. Í framhaldinu tekur svo Skaginn 3X við en eftir á að koma fyrir vinnslubúnaði á millidekki og setja sjálfvirkt lestarkerfi í skipið.

Heimasíða H.B. Granda hf. 22 júní 2017.



2890. Akurey AK 10.


2890. Akurey AK 10.


2890. Akurey AK 10. Togþilfar.      


2890. Akurey AK 10.


2890. Akurey AK 10.


2890. Akurey AK 10.


2890. Akurey AK 10.


2890. Akurey AK 10.                                                                                                                  

Systurskipin Engey RE 91 og Akurey AK 10 á Skaganum í dag.(C) Þórhallur S Gjöveraa. 25 júní 2017.
 
 Móttökuathöfn vegna komu Akureyjar 

Í gær var haldin móttökuathöfn vegna komu ísfisktogarans Akureyjar AK til landsins. Athöfnin fór fram í heimahöfn skipsins á Akranesi kl.15 með því að Vilhjálmur Vilhjálmsson, forstjóri HB Granda, bauð gesti velkomna. Dagskrá móttökuathafnarinnar var að öðru leyti sem hér segir:
Benedikt Jóhannesson, fjármála- og efnahagsráðherra, flutti ávarp. Að því loknu flutti karlakórinn Svanir eitt lag. Því næst tók Ólafur Adolfsson, formaður bæjarráðs Akraness, til máls og flutti stutt ávarp. Þá kom að því að Ingibjörg Björnsdóttir, ekkja Árna Vilhjálmssonar, sem gegndi stjórnarformennsku hjá HB Granda til dauðadags, gaf skipinu nafn.
Að því búnu blessaði séra Eðvarð Ingólfsson, sóknarprestur á Akranesi, skipið. Eftir blessun söng karlakórinn Svanir svo að nýju.
Í lok athafnarinnar gafst gestum kostur á að skoða skipið og þiggja veitingar um borð. Samúel Þorsteinsson flutti við sama tækifæri nokkur lög um borð í skipinu.
Akurey AK var svo til sýnis fyrir bæjarbúa og aðra eftir að móttökuathöfninni lauk formlega.

 Heimasíða H.B. Granda hf. 24 júní 2017.

Flettingar í dag: 268
Gestir í dag: 11
Flettingar í gær: 693
Gestir í gær: 60
Samtals flettingar: 852326
Samtals gestir: 62761
Tölur uppfærðar: 18.6.2024 02:07:38